🔴 DIEGO CALVO ENTREGA UNHA NÉCORA DE OURO Á UCO NA XXII GALA DA FUNDACIÓN GALEGA CONTRA O NARCOTRÁFICO

O conselleiro de Presidencia, Xustiza e Deportes, DIEGO CALVO, asistiu esta tarde á XXII Gala Anual da Fundación Galega Contra o Narcotráfico, un evento xa consolidado no calendario galego como referente na loita contra esta lacra social. Durante a gala, entregou unha das Nécoras de Ouro á Unidade Central Operativa (UCO) da Garda Civil pola súa contribución destacada á loita contra o narcotráfico en Galicia.

O acto contou tamén coa presenza do director xeral de Emerxencias e Interior, Santiago Villanueva, o director xeral de Xustiza, José Tronchoni, e o delegado territorial da Xunta en Pontevedra, Agustín Reguera.

Nesta edición, a fundación recoñeceu tamén o labor doutras persoas e entidades que traballan desde diferentes ámbitos na prevención e loita contra as drogas. Recibiron o galardón o Servizo Preventivo Asistencial de Drogodependencias (SPAD) de Vilagarcía, a xornalista Alejandra Andrade e o exresponsable de Cáritas, José Anuncio Mouriño Rañó.

Ademais, a gala outorgou a Distinción de Honra ao Colexio de Procuradores da Coruña, pola súa implicación no desenvolvemento do Servizo de Xestión de Bens Intervidos ao Narcotráfico, unha iniciativa posta en marcha en colaboración coa fundación e co apoio da Xunta de Galicia, que permite a xestión e o depósito dos bens intervidos nas operacións contra o narcotráfico.

A gala reafirmou unha vez máis o compromiso institucional e social de Galicia na loita contra o narcotráfico e na defensa das persoas afectadas polas súas consecuencias.