O grupo municipal de Esquerda Unida denuncia que o goberno local de Vilagarcía continúa apostando polo formigón como material principal nas obras de renovación no casco histórico de Vilaxoán, neste caso na zona de Bouza de Abaixo. A formación considera que esta decisión ignora criterios fundamentais de sustentabilidade e conservación patrimonial.
O voceiro de EU, Juan Fajardo, lamenta que “se siga empregando o formigón, un material altamente contaminante tanto na súa fabricación como no impacto térmico e visual que provoca”. Esquerda Unida alerta de que esta intervención, lonxe de ser unha mellora urbana, supón un atentado contra o valor histórico, a estética e a sustentabilidade da contorna de Vilaxoán.
Desde EU insisten en que o proxecto debe repensarse e que existen alternativas máis respectuosas co patrimonio, como materiais tradicionais de baixo impacto ambiental. Critican que, mentres outras vilas optan por solucións integradas e coherentes cos seus centros históricos, en Vilagarcía “emérranse en converter Vilaxoán nun deserto de formigón”.
Finalmente, Fajardo conclúe: “O noso patrimonio non se humaniza con formigón. O patrimonio protéxese con responsabilidade, non destruíndo a esencia histórica da vila”.
