🔴 O ALCALDE DE VILAGARCÍA REUNIRASE CO PRESIDENTE DE RENFE O 26 DE MAIO PARA RECLAMAR A MANTENZA DA PRIMEIRA CONEXIÓN CON MADRID

O goberno local reclama seriedade á oposición e lembra que a cidade está conectada coa capital grazas ao traballo feito polos socialistas

Vilagarcía, 16 de maio de 2025 – O alcalde de Vilagarcía, Alberto Varela, manterá o vindeiro 26 de maio unha reunión co presidente de RENFE en Madrid para coñecer de primeira man os cambios previstos nas conexións ferroviarias entre Galicia e a capital do Estado, e reclamar a continuidade da parada do tren de alta velocidade das 06:36 horas na cidade.

Dende o goberno local reclámase á oposición, especialmente ao Partido Popular, “un pouco de seriedade e responsabilidade”, ante as críticas pola posible perda da primeira conexión do día con Madrid. “Xa aburre o argumentario do ‘desprezo’ do presidente do Goberno a Vilagarcía. Cando se consegue algo, é pola súa ‘presión’; cando se perde, é culpa do alcalde. Así calquera fai oposición”, ironizan.

O executivo municipal considera que o PP debería revisar a súa propia hemeroteca: “Negaron que o AVE chegaría a Vilagarcía e agora recoñecen como ‘famosa campaña’ que estamos a tres horas e un café de Madrid. Iso non se logrou co PP aquí e alá, senón co traballo dos gobernos socialistas en Vilagarcía e en Madrid”.

A reunión prevista co presidente de RENFE será a ocasión para que o alcalde defenda os intereses non só de Vilagarcía, senón de toda a comarca do Salnés. Desde Ravella lembran que, neste tipo de debates, “se non se consegue restaurar a parada da mañá, a culpa será do alcalde; se se consegue, será grazas ao PP. Unha bicoca”.

O goberno local pide “paciencia e rigor” antes de lanzar críticas apocalípticas e lembra que a conexión con Madrid existe, é real e operativa, malia os augurios de quen antes dubidaban da súa viabilidade.

#Vilagarcía #AVE #AltaVelocidade #Renfe #PedroSánchez #AlbertoVarela #Infraestruturas #Salnés #TrenMadrid #ConexiónFerroviaria #PP #GobernoLocal