🔴 O BNG PROPÓN RECUPERAR A ANTIGA FÁBRICA MALVEIRAS PARA CREAR UN CENTRO DE INTERPRETACIÓN EN CARRIL

O Bloque Nacionalista Galego vén de presentar no rexistro do Concello de Vilagarcía unha moción para o pleno de maio co obxectivo de recuperar o edificio da antiga fábrica de conservas Malveiras, situada na zona da Rosa en Carril, fronte á illa de Cortegada, e propoñer a súa conversión nun Centro de Interpretación ao servizo da veciñanza e visitantes.

Segundo destaca o BNG, o edificio é un dos poucos vestixios que quedan do Carril industrial, un núcleo que chegou a albergar até 25 fábricas relacionadas con sectores como a conserva, os mosaicos, a metalurxia, os mistos ou o xabón. Empresas como “Conservas Malveiras”, “Conservas Baltar” ou “Mequinsa” foron parte dun tecido económico impulsado pola actividade portuaria e pola histórica conexión ferroviaria, primeira en Galicia.

Desde o grupo nacionalista subliñan que a perda deste patrimonio material supón tamén un dano á memoria colectiva e á identidade local: “Deixar desaparecer o edificio de Malveiras sería ser cómplices da perda dunha parte esencial da nosa historia”.

Para o BNG, Carril non se entende sen o mar nin sen Cortegada, e por iso consideran que o espazo ideal para manter viva esa relación é este inmoble estratexicamente situado. O Centro de Interpretación proposto permitiría explicar as particularidades da ría, o vínculo histórico da vila co mar e a importancia do seu pasado industrial.

“Este edificio pode e debe converterse nun lugar de benvida para quen nos visita e, sobre todo, nun espazo para o goce e coñecemento de toda a cidadanía”, explican na moción.

O BNG insta ao Concello a iniciar as accións necesarias para a recuperación do edificio e a súa rehabilitación como espazo cultural, educativo e histórico, poñendo en valor o patrimonio local e a memoria mariñeira de Carril.