O goberno municipal vén de presentar o proxecto de humanización da rúa Bouza de Abaixo, en Vilaxoán, cun investimento de 775.700 euros e un prazo de execución de 8 meses. A actuación suporá unha transformación integral deste ámbito urbano, cunha rúa de plataforma única de prioridade peonil, completamente accesible.
O alcalde, Alberto Varela, subliñou que “esta actuación será unha das máis cuantiosas dos vindeiros anos, xa que supón preto do 80% dos fondos que lle corresponden ao Concello de Vilagarcía no marco do Plan Máis Provincia da Deputación”. O rexedor destacou tamén que se trata dunha intervención “moi demandada polos veciños” e nunha das zonas “máis transitadas de Vilaxoán”.
O proxecto abrangue uns 2.200 metros cadrados, dende a entrada por un costado da Praza de Abastos ata a saída cara á avenida de Cambados. “Como todo Vilaxoán, é unha zona patrimonial, con rúas estreitas e construcións tradicionais”, indicou a concelleira de Urbanismo, Paola María, quen explicou que estas características condicionaron o deseño da obra.
Establécese unha rúa con plataforma única e un empedrado especial nas áreas de maior riqueza patrimonial —entre Avelina Nogueira e Pardiñas, así como na contorna do cruce con Benigno Santos, onde se atopa tamén unha zona axardinada que será acondicionada—. No resto do trazado empregarase formigón con resaltes de cores para sinalar a prioridade peonil e limitar o tráfico a residentes.
A actuación inclúe, como é habitual nestas obras de gran calado, a renovación completa das infraestruturas soterradas: separación das redes de saneamento e pluviais, mellora das instalacións de baixa tensión, iluminación e telefonía. Tamén se renovará o mobiliario urbano con novos bancos, papeleiras e farois.
Varela salientou que “as inversións municipais chegan a todas as zonas do concello, tamén a Vilaxoán, onde xa se acometeron melloras importantes como nas rúas Vázquez Leis e Ameixeiras”. Engadiu que actuacións coma esta supoñen “un avance fundamental en accesibilidade e urbanismo”, poñendo a Vilagarcía “á vangarda” nesta materia.
