O presidente da Deputación de Pontevedra, Luis López, puxo en valor o enoturismo como un dos grandes reclamos da provincia durante un encontro celebrado nas Bodegas Martín Códax de Cambados. A cita contou coa participación de profesionais do sector turístico das provincias de Pontevedra e Huelva, no marco dunha viaxe institucional organizada pola Deputación de Huelva para dar a coñecer a súa oferta turística.
Durante o acto, o mandatario provincial deu a benvida á deputada de Turismo onubense, Ana Delgado, así como ao resto da expedición andaluza, destacando os vínculos que unen ambos territorios. “É unha honra acoller na nosa provincia a representantes dun territorio como Huelva, co que compartimos unha historia e tradición marítima común. Se a Baiona arribou a carabela Pinta tras o descubrimento de América, do porto de Paus partiu a expedición de Colón cara ao novo mundo”, sinalou López.
O presidente provincial tamén puxo o foco nos elementos naturais e turísticos que comparten ambas provincias, como os espazos naturais protexidos (Doñana e as Illas Atlánticas) ou a hospitalidade como sinal de identidade. “Os visitantes chegan polas paisaxes e os recursos, pero sempre volven polo trato recibido”, engadiu.
Neste contexto, Luis López agradeceu á Deputación de Huelva a escolla das Rías Baixas como escenario para presentar o seu destino e ás Bodegas Martín Códax por actuar como “embaixadores de luxo” da provincia. Destacou ademais o traballo da Deputación de Pontevedra na promoción do destino turístico da provincia, presente recentemente en encontros sectoriais en Málaga e Madrid, feiras internacionais como a de Londres ou eventos especializados como o Congreso Internacional da Camelia en Xapón.
“Con estandartes como as Bodegas Martín Códax e os viños da Denominación de Orixe Rías Baixas, o enoturismo convértese nunha experiencia única para perderse entre viñedos, respirar ao aire libre e desfrutar da mellor gastronomía e do mellor viño”, afirmou.
López concluíu lembrando que a provincia ofrece un turismo descentralizado e desestacionalizado, con múltiples propostas que completan a súa oferta, como a ruta da camelia, as variantes do Camiño de Santiago, o termalismo ou o patrimonio monumental de castelos como os de Soutomaior e Sobroso. “As mostras do patrimonio dun destino turístico composto por 61 concellos son infinitas”, finalizou.
