🔴 O PP DE CAMBADOS ALERTA DUNHA “SITUACIÓN ECONÓMICA CRÍTICA” NO CONCELLO E PIDE UN PLAN DE CHOQUE

A voceira municipal do Partido Popular de Cambados, Sabela Fole, vén de advertir da grave situación económica que atravesa o Concello, asegurando que as contas municipais empeoraron de forma alarmante por mor da xestión do actual cuatripartito. A concelleira cualificou a situación de “crítica” e responsabilizou directamente ao alcalde, como responsable da área de Facenda.

Fole baseou as súas declaracións no último informe do Consello de Contas, que –segundo apuntou– “fai serias advertencias e mesmo dubida da sustentabilidade dos servizos municipais e do pago dos gastos correntes”. A popular asegurou que “non se trata dunha opinión do PP, senón dun diagnóstico oficial”.

Segundo os datos facilitados pola voceira, o aforro neto pasou de 761.558 euros a un resultado negativo de 240.370 euros nun só ano. Ademais, o remanente de tesourería sitúase en 152.767 euros, “o terceiro máis baixo entre os concellos de entre 10.000 e 20.000 habitantes de Galicia”. Fole comparou esta cifra cos máis de 6,1 millóns de remanente que presenta O Grove, e engadiu que só nove concellos medianos en toda Galicia presentan remanente de gastos xerais en negativo.

A edil tamén sinalou que Cambados é, xunto con Fene, un dos únicos dous concellos medianos de Galicia con aforro neto e remanente de tesourería negativos. Estima que as perdas anuais nos principais indicadores económicos se achegan ao millón de euros.

Ante este panorama, Fole instou ao goberno local a elaborar un plan urxente de choque en lugar de contemplar unha subida de impostos. Advertiu que “xa se lanzaron globos sonda” sobre esta posibilidade, pese á forte contestación cidadá que, segundo ela, suscitaría unha medida deste tipo.

Por outra banda, a voceira do PP destacou que Cambados é o concello da súa categoría na provincia que máis fondos recibe da Xunta a través do mecanismo PICA, que representa o 17,75% dos seus gastos totais. Comparou esta cifra coas de outros concellos como Moaña (14,78%), Gondomar (15,06%), Bueu (13,41%), Mos (13,26%) ou Baiona (9,88%).

Fole concluíu afirmando que “o único aspecto que non ía rematadamente mal eran as contas, aínda que non houbese diñeiro para case nada, pero agora todos os números están en vermello e hai un risco real para os servizos municipais e o seu funcionamento”.