🔴 O PP DE VILAGARCÍA ESIXE EXPLICACIÓNS POLOS AFUNDIMENTOS NA ESTACIÓN DE FERROCARRIL E SOLUCIÓNS DEFINITIVAS

O Partido Popular de Vilagarcía mostrou a súa preocupación polos continuos afundimentos no aparcadoiro da estación de ferrocarril da cidade. A través do deputado no Congreso e concelleiro, Juan Andrés Bayón, o PP rexistrou unha iniciativa parlamentaria dirixida ao Goberno de España, coa que busca coñecer a orixe destes afundimentos e reclamar actuacións urxentes e definitivas.

Bayón puxo o foco na aparición dun novo socavón na primeira semana de abril, que obrigou a reorganizar a circulación e provocou preocupación entre veciñanza e usuarios. O deputado lembrou que en xuño de 2019 xa se producira outro afundimento moi grave na mesma zona, o que obrigou a pechar o aparcadoiro durante meses.

A través da iniciativa, o PP solicita saber se se fixeron avaliacións técnicas do terreo, estudos de seguridade, e cal é o calendario previsto para as reparacións necesarias. A portavoz municipal, Ana Granja, subliñou que “os vilagarciáns merecen explicacións e solucións. Non se pode repetir o mesmo problema seis anos despois sen medidas preventivas”.

Desde o PP tamén sinalan a grave falta de prazas de aparcamento na estación, o que está a provocar queixas constantes de usuarios que chegan tarde ao tren por non atopar sitio para deixar o coche. “Os aparcadoiros disuasorios foron pechando para dar paso a vivendas, e os que quedan son temporais”, denunciou Granja.