🔴 O PP ESIXE UN TRATO DIGNO PARA A ESTACIÓN DE TREN DE CATOIRA TRAS A NEGATIVA DO GOBERNO A MELLORAR UNHAS INSTALACIÓNS ABANDONADAS

O PP de Pontevedra mostrou este xoves a súa indignación tras recibir a resposta oficial do Goberno de España que confirma que non ten previsto nin mellorar nin dotar de servizos a estación de tren de Catoira, pese ás numerosas denuncias do seu estado de abandono e á súa importancia para os máis de 67.000 usuarios anuais.

A través dunha pregunta rexistrada no Congreso polos deputados Juan Bayón, Irene Garrido e Pedro Puy, o Grupo Popular solicitaba información sobre posibles melloras na estación, como a implantación de sistemas telemáticos para compra de billetes ou tarefas de mantemento. A resposta foi negativa en ambos casos.

Durante unha visita á estación, os deputados, xunto á voceira local Estefanía Frieiro e outros representantes do PP, comprobaron de novo a ausencia total de servizos: sen atención presencial, sen máquinas expendedoras, nin información básica como horarios ou teléfonos de emerxencia. Ademais, denunciaron a falta de limpeza e mantemento, o que transmite unha sensación de “abandono absoluto”.

“O caos ferroviario provocado pola pésima xestión do Ministerio de Transportes non só afecta ás grandes cidades, senón tamén aos pequenos concellos coma Catoira”, lamentou Juan Bayón. “Non é admisible que a cidadanía non poida acceder a uns servizos públicos mínimos en condicións dignas”.

O PP comprométese a seguir defendendo esta demanda no Congreso, agradecendo o traballo da agrupación local en visibilizar a situación. “É unha reivindicación máis que xusta e non imos deixala caer no esquecemento”, concluíu Bayón.