O Concello de Vilagarcía presentou esta mañá a programación da oitava edición do ciclo musical Ágora Vermú, que este ano terá como protagonista o rock en galego. A iniciativa, que se celebrará durante os cinco domingos do mes de xuño, levará actuacións gratuítas a diferentes barrios da cidade, sempre ás 13:00 horas, co obxectivo de descentralizar a oferta cultural e dinamizar a vida social nas rúas.
O ciclo comezará o domingo 1 de xuño no Carril coa actuación de Xoubas, unha banda compostelá que mestura rocksteady, R&B e soul xamaicano. A programación continuará o día 8 no Piñeiriño con Noite Fechada, grupo do Salnés que regresa aos escenarios con novo repertorio e a enerxía de sempre.
O ecuador do ciclo, o 15 de xuño, celebrarase no barrio dos Duráns da man de Espiño Band, liderada por Alfonso Espiño e recoñecida pola súa proposta de pop rock psicodélico en galego, galardoada co premio Galicia Creativa e presente en numerosos festivais.
O domingo 22 de xuño, a céntrica rúa Romero Ortiz acollerá o concerto de The Limboos, que presentarán o seu cuarto disco, ‘Off The Loop’, cun son influenciado por Iggy Pop e a psicodelia máis elegante.
O ciclo pecharase o 29 de xuño en Vilaxoán coa banda local Chaladura Rock, formada en 2014 e cun repertorio que homenaxea os clásicos do rock, tanto en inglés como en español.
O alcalde Alberto Varela destacou que “Vilagarcía non para” e que este tipo de propostas culturais son clave para consolidar á cidade como referente musical: “Somos o concello máis musical de Galicia”, sinalou. Pola súa banda, a concelleira de Cultura, Sonia Outón, animou á veciñanza a “organizar xuntanzas con amigos e familia para desfrutar dun domingo diferente” e contribuír ao éxito dun ciclo que “marca o comezo da tempada de verán en Vilagarcía”.
