A Mancomunidade do Salnés vén de confirmar o notable incremento de interese por dúas das rutas máis emblemáticas da comarca: a Ruta do Padre Sarmiento e a Variante Espiritual. Nos últimos meses multiplicáronse as consultas a través do correo electrónico e redes sociais, unha tendencia que os técnicos de Turismo atenden de xeito personalizado para axudar aos visitantes a planificar os seus percorridos.
A Ruta do Padre Sarmiento, cada vez máis popular entre senderistas
A Ruta do Padre Sarmiento consolídase como unha das opcións favoritas entre os afeccionados ao sendeirismo. Moitos dos visitantes realizan o percorrido en grupos de cinco ou máis persoas, aproveitando para gozar da paisaxe, a gastronomía, a cultura e o lecer que ofrece a comarca. Ademais, trátase dun perfil de visitante con dispoñibilidade de tempo, o que lles permite viaxar con calma e profundar na experiencia.
Segundo destacan desde o sector privado, gran parte destes senderistas optan por aloxarse en hoteis de categorías superiores, un fenómeno que experimentou un repunte significativo no último ano. O feito de que estas reservas teñan lugar maioritariamente fóra da tempada alta converte esta ruta nun recurso clave para a desestacionalización do turismo no Salnés.
A Variante Espiritual medra como referencia no Camiño de Santiago
A Variante Espiritual, pola súa banda, continúa medrando como unha alternativa sólida dentro das rutas xacobeas. Atrae a peregrinos en grupos máis reducidos, que buscan experiencias auténticas e vinculadas á tradición do Camiño. O crecemento do número de aloxamentos e negocios ao longo do percorrido reflicte o impacto económico positivo que esta ruta supón para os concellos polos que discorre.
O seu atractivo singular segue gañando adeptos ano tras ano, consolidándose como unha proposta de referencia para quen busca saír das rutas máis convencionais a Compostela.
Valoración institucional
O presidente da Mancomunidade do Salnés, David Castro, amosou a súa satisfacción polo éxito destas iniciativas: “Estamos moi satisfeitos cos resultados da estratexia de promoción que levamos a cabo. O noso equipo traballa día a día en contacto directo cos usuarios, resolvendo dúbidas e asesorando de forma personalizada. Este labor de proximidade é clave para que cada vez máis persoas escollan as nosas rutas”.
Castro tamén quixo destacar a importancia da colaboración: “Este éxito é froito do esforzo conxunto do sector público e privado. Somos unha cadea onde cada elo cumpre unha función esencial. Só traballando da man conseguiremos que O Salnés siga medrando como destino turístico de referencia”.
