PORTAS REFORZA O ACCESO Á CULTURA DA MOCIDADE E DA VECIÑANZA CON ABONOS SUBVENCIONADOS PARA O FESTIVAL PORTAMÉRICA 2025
O Concello de Portas reafirma o seu compromiso coa cultura e a igualdade de oportunidades coa posta en marcha, un ano máis, do programa “Portas Xove”, que permitirá á mocidade empadroada no municipio, con idades comprendidas entre os 12 e os 30 anos, asistir aos tres días do Festival PortAmérica por un prezo simbólico de 20 euros, máis os gastos de xestión correspondentes.
Como gran novidade nesta edición, grazas ás xestións do alcalde Ricardo Martínez coa organización do evento, tamén as persoas maiores de 30 anos empadroadas en Portas poderán beneficiarse dunha tarifa reducida e adquirir o seu abono por 50 euros, máis gastos de xestión.
Para acceder a estas entradas a prezo bonificado, será necesario solicitar un código personalizado nas oficinas municipais, presentando o DNI. As entradas serán nominativas e intransferibles, co obxectivo de garantir unha distribución xusta e evitar o seu uso indebido.
“Esta iniciativa permite achegar á mocidade á cultura e garantir que toda a veciñanza de Portas poida gozar dun evento de primeiro nivel a prezos accesibles”, destacou o rexedor.
PORTAMÉRICA 2025: MÚSICA, GASTRONOMÍA E COMUNIDADE
O Festival PortAmérica celebrarase os días 3, 4 e 5 de xullo nas inmediacións da Azucreira de Portas, cun cartel musical de gran nivel que contará con artistas como Emilia, Melendi, Love of Lesbian, Mikel Izal, Viva Suecia, Duncan Dhu, Iván Ferreiro, Sidonie, La La Love You e No Te Va Gustar, entre outros.
Ademais da música, o festival ofrecerá unha nova edición do multipremiado ShowRocking, considerada a maior cociña efémera do mundo, liderada polo chef galego Pepe Solla. Máis de 30 chefs de prestixio internacional, moitos deles con Estrelas Michelin, ofrecerán máis de 20.000 petiscos a prezos populares, creados exclusivamente para o evento. Entre os nomes destacados atópanse Albert Adrià, Jordi Roca, Vicky Sevilla, Janaina Torres ou Vasco Coelho Santos.
O Concello de Portas e a organización do festival animan a toda a veciñanza, especialmente á mocidade, a aproveitar esta oportunidade única para formar parte dunha experiencia cultural de referencia que continúa a consolidarse como un punto de encontro entre Europa e América Latina.
