🔴 TRES DETIDOS EN VILANOVA DE AROUSA NUNHA OPERACIÓN CONTRA O TRÁFICO DE DROGAS E O CRIME ORGANIZADO

Axentes da Garda Civil de Pontevedra, en coordinación coa UDYCO da Comisaría de Pontevedra e a Área de Investigación da Garda Civil de Cambados, desenvolveron este mércores a Operación “CIPRO II”, baixo a dirección do Xulgado de Primeira Instancia e Instrución número 2 de Vilagarcía de Arousa.

A operación saldouse coa detención de tres veciños de Vilanova de Arousa, todos cidadáns españois con antecedentes por delitos similares, como presuntos autores dun delito de tráfico de drogas e outro de pertenza a grupo criminal.

Durante os rexistros realizados en varios inmobles da localidade, os axentes interviñeron 173 gramos de cocaína, cinco bellotas de hachís, seis plantas de marihuana, catro caixas con cogollos, unha envasadora ao baleiro, dúas básculas de precisión, terminais móbiles, equipos informáticos, un vehículo e 1.000 euros en efectivo.

Os detidos foron postos a disposición xudicial o venres pola mañá, quedando en liberdade con cargos. A investigación continúa aberta e non se descartan novas detencións nas vindeiras horas ou días.

Esta operación representa un novo golpe ao narcotráfico na comarca do Salnés, zona sinalada polos corpos de seguridade como estratéxica nas rutas do tráfico de estupefacientes.