🔴 VILAGARCÍA ADXUDICA O PLAN DE REPARACIÓN DE BEIRARRÚAS PARA MELLORAR A SEGURIDADE E ACCESIBILIDADE

A Xunta de Goberno Local de Vilagarcía vén de aprobar a adxudicación do novo plan de reparación de beirarrúas á empresa Moncosa, cun investimento de 47.781 euros. O proxecto inclúe a intervención sobre 680 metros cadrados de beiravías en mal estado no casco urbano, co obxectivo de mellorar a accesibilidade e garantir a seguridade das persoas peóns.

Trátase dunha medida solicitada polo propio servizo de obras, xa que os operarios municipais están actualmente centrados noutras tarefas de mantemento en instalacións públicas. Con este reforzo externo, preténdese dar resposta á necesidade de manter en bo estado as vías polas que transita a veciñanza.

As actuacións incluirán a demolición e reposición do pavimento deteriorado, colocando novas baldosas idénticas ás existentes, a reparación dos bordos e a retirada dos restos xerados. O Concello destaca que estas melloras permitirán ofrecer unha imaxe máis coidada da zona centro da cidade, reducindo os riscos e molestias que causan as beirarrúas afundidas ou rachadas.