🔴 VILAGARCIA LICITA AS OBRAS DE MELLORA DO SANEAMENTO NA AVENIDA ROSALÍA DE CASTRO, NO CARRIL, POR 122.000 €

Os traballos permitirán substituír un colector deteriorado e instalar unha rede de pluviais nun tramo duns cen metros

O Concello de Vilagarcía vén de sacar a licitación as obras de ampliación e mellora da rede de saneamento nun tramo da Avenida Rosalía de Castro, no Carril. O proxecto conta cun orzamento de 122.000 euros e afectará a uns cen metros de percorrido, entre o cruzamento coa rúa Esperanza e o da rúa Lucena. As empresas interesadas poden presentar as súas ofertas ata o 2 de xuño a través da Plataforma de Contratación do Estado. O prazo de execución será de tres meses.

A actuación busca dar solución aos constantes problemas de atascos provocados polo mal estado do colector existente, de formigón, que presenta múltiples fendas e roturas. Trátase dun tramo que o servizo municipal de obras identificou como especialmente deteriorado durante unha das revisións habituais da zona.

As obras incluirán a demolición da beirarrúa e a escavación dunha gabia para colocar un novo colector, xa que se descarta calquera reparación parcial debido ao seu estado. Ademais, instalarase unha nova rede de pluviais para separar as augas residuais das pluviais, mellorando así a capacidade de evacuación e evitando desbordamentos nos días de choiva intensa.

A intervención obrigará tamén a levantar parte da calzada, especialmente no cruzamento das rúas Xalda con Doutor Nicolás Viqueira Conde. Unha vez finalizados os traballos, procederase ao reasfaltado da vía.

O alcalde Alberto Varela lembrou que a Avenida Rosalía de Castro é unha vía de titularidade autonómica, e que sofre importantes deficiencias debido á falta de mantemento por parte da Xunta. “As filtracións derivadas do desleixo afectan aos servizos soterrados, que son competencia municipal. Esta rúa soporta moito tráfico durante todo o ano, especialmente no verán, polo que é fundamental acometer esta obra”, subliñou o rexedor, quen volveu reclamar á administración autonómica unha actuación urxente na calzada, que presenta numerosos socavóns e un avanzado estado de deterioro.