A Garda Civil do Posto Principal de Sanxenxo deu por finalizada a operación denominada TAKO-SAN25, coa investigación de tres homes de 31, 25 e 24 anos, todos eles veciños da provincia de Alacante, como presuntos autores dun delito continuado de estafa e de pertenza a grupo criminal. Os feitos investigados suman un prexuízo económico de 10.218 euros.
A investigación comezou no pasado mes de setembro, cando se tiveron coñecemento de dúas denuncias, unha en Burela (Lugo) e outra en Icod de los Vinos (Santa Cruz de Tenerife), por cargos non autorizados en contas bancarias. Estes cargos foran realizados en distintos puntos do termo municipal de Sanxenxo.
O grupo investigado empregaba unha técnica de fraude coñecida como smishing, que consiste no envío de mensaxes de texto (SMS) ou de mensaxería instantánea facéndose pasar por entidades lexítimas (bancos, empresas de paquetería, etc.), co obxectivo de enganar ás vítimas. As mensaxes inclúen enlaces que dirixen a páxinas web falsas, moi semellantes ás orixinais, onde se solicita información persoal ou financeira.
Unha vez obtidos os datos bancarios, os autores asociaban as tarxetas a dispositivos móbiles que utilizaban exclusivamente para facer pagos. A súa actividade centrábase en locais de apostas deportivas, xa que permiten tanto pagar con tarxeta como retirar diñeiro en efectivo, algo que complica o seu rastrexo.
Durante as pescudas, a Garda Civil detectou un nivel de vida moi por riba das posibilidades económicas aparentes dos sospeitosos, con viaxes a destinos como Tailandia ou os Emiratos Árabes Unidos e con numerosos antecedentes por feitos similares. Estes datos foron determinantes para centrar a investigación.
En abril de 2025, o primeiro dos implicados foi investigado no Posto Principal de Dolores (Alacante), e a finais de maio foron identificados os outros dous membros no Posto Principal de Almoradí (Alacante), quedando así pechada a operación.
A Garda Civil recomenda á cidadanía que non acceda a ligazóns sospeitosas
