🔴 A ANPA DO CEIP A LOMBA INTERVIRÁ NO PLENO DE VILAGARCÍA PARA RECLAMAR MELLORAS NA ATENCIÓN EDUCATIVA

 

 A comunidade educativa do CEIP A Lomba terá voz no vindeiro pleno do Concello de Vilagarcía, que se celebrará o xoves 31 de xullo ás 17:00 horas. Grazas a unha moción presentada polo grupo municipal do BNG, a ANPA A Xunqueira poderá intervir para reclamar unha atención educativa máis xusta, inclusiva e adaptada ás necesidades reais do alumnado deste centro.

Na súa intervención, a ANPA pedirá que se inste á Consellería de Educación a dotar ao colexio do persoal necesario para atender aos máis de 120 nenos e nenas con necesidades especiais e específicas que actualmente cursan estudos no centro. Demandan, ademais, que o persoal de Audición e Linguaxe e Pedagoxía Terapéutica teña continuidade no centro, evitando a itinerancia entre varios colexios, algo que dificulta a vinculación co alumnado e o traballo educativo.

Outro dos puntos clave da moción é a solicitude de manter a actual parella educativa na aula de 5º de infantil no curso 2025-2026, formada pola titora e a profesora de apoio, por seren figuras de referencia para o alumnado. Así mesmo, reclámase conservar a dobre liña educativa en 4º de infantil, como se veu facendo tradicionalmente, posto que o centro dispón dos recursos, espazos e profesorado necesarios para mantela.

Desde a ANPA sinalan que estas medidas son imprescindibles para garantir a inclusión e unha atención educativa de calidade, e fan un chamamento ás familias e á cidadanía a achegarse ao pleno e apoiar as súas reivindicacións.