🔴 INVESTIGADA UNHA MULLER DE BUEU POR ESTAFA CONTINUADA EN ALUGUEIROS TURÍSTICOS NA ILLA DE ONS

 

INVESTIGADA UNHA MULLER DE BUEU POR ESTAFA CONTINUADA EN ALUGUEIROS TURÍSTICOS NA ILLA DE ONS

A presunta autora localizouse en Huesca e podería ter obtido máis de 2.000 euros mediante reservas falsas. As vítimas pagaban por vivendas que xa estaban ocupadas.

Efectivos do Posto da Garda Civil de Marín investigan a unha muller de 38 anos, veciña de Bueu, como presunta autora dun delito de estafa continuada relacionado co alugueiro fraudulento de vivendas turísticas na Illa de Ons.

Desde principios de xullo, foron recollidas 10 denuncias de persoas que aseguraron ter reservado e pagado o alugueiro de vivendas na illa, para decatarse, ao chegar, de que estaban xa ocupadas por outros usuarios. Os importes abonados foron superiores aos 2.000 euros no total.

A investigación iniciada polos axentes permitiu localizar á sospeitosa en Huesca, aínda que o seu domicilio habitual está en Bueu. Conta con antecedentes policiais por feitos similares.

🔍 A Garda Civil non descarta que haxa máis vítimas, polo que recomenda a quen se sinta afectado que presente a correspondente denuncia.

🛑 Lémbrase tamén que na Illa de Ons só está permitida a pernocta no cámping autorizado, e que coa entrada en vigor o 1 de xullo de 2025 da nova normativa estatal sobre alugueiros turísticos, é obrigatorio acreditar a propiedade da vivenda para poder inscribila no Rexistro Único de Vivendas de Uso Turístico. Polo tanto, as vivendas na Illa de Ons non poden legalmente ser alugadas con fins turísticos.

As dilixencias foron entregadas no Xulgado de Garda de Marín, onde tamén serán remitidas as novas denuncias que se vaian rexistrando. A investigada deberá comparecer cando sexa requirida.

📢 A Garda Civil aconsella extremar as precaucións á hora de contratar aloxamentos vacacionais, utilizar plataformas oficiais e seguras, e desconfiar de ofertas sospeitosamente baratas ou sen garantías documentais.