A Garda Civil de Pontevedra investiga a un mozo de 23 anos, veciño da cidade, como presunto autor dun delito de odio recollido no artigo 510.1a do Código Penal. A investigación centrouse nos contidos que esta persoa difundía a través das súas redes sociais, nos que fomentaba, promovía e incitaba ao odio, á hostilidade e á discriminación por motivos de raza, etnia, nacionalidade, relixión, xénero ou orientación sexual.
Segundo informa a Garda Civil, nas súas publicacións o investigado manifestaba abertamente mensaxes de supremacía da raza branca sobre o resto, chegando a expresar o seu desexo explícito de exterminio de persoas racializadas, sudamericanas ou musulmás, ás que mesmo deshumanizaba comparándoas con animais.
A investigación atribúe ao mozo un presunto delito cometido no exercicio dos dereitos fundamentais e das liberdades públicas recollidas na Constitución Española, concretamente no relativo ao discurso de odio.
As dilixencias instruídas foron entregadas ao Xulgado de Instrución de garda de Pontevedra e tamén se remitiu copia á Fiscalía. O investigado deberá comparecer ante a autoridade xudicial cando sexa legalmente citado.
Desde as forzas de seguridade lémbrase á cidadanía que é posible denunciar este tipo de comportamentos tanto ante a Garda Civil como ante a Policía Nacional, así como na Oficina Nacional de Lucha contra los Delitos de Odio, dependente do Ministerio do Interior. Recoméndase achegar probas como capturas de pantalla, mensaxes ou calquera outro indicio que poida resultar útil para a investigación.
