🔴 O CONCELLO ESIXE UNHA RECTIFICACIÓN A “MÄGO DE OZ” PARA SEGUIR ADIANTE CO PROCESO DE CONTRATACIÓN

 

O Concello de Vilagarcía contactou este martes co grupo musical Mägo de Oz para esixirlle unha rectificación pública polas polémicas declaracións realizadas por un dos seus membros nas últimas horas. A decisión sobre se se manterá ou non o concerto previsto para o 19 de agosto dependerá da resposta do grupo ao longo do día de hoxe.

“O que se disfraza de pretendido humor non pode ser escusa para frivolizar sobre cuestións tan graves como a prostitución ou o consumo de drogas”, sinala o goberno local nun comunicado oficial. O executivo lembra que aínda non existe contrato formal, xa que se trata dun procedemento de contratación negociada sen publicidade, o que permite escoller directamente o artista, pero require uns pasos administrativos que aínda están en tramitación.

Desde o Concello explican que a elección de Mägo de Oz se baseou exclusivamente na súa traxectoria e creación artística, e non nas opinións políticas individuais dalgún dos seus integrantes: “As ideas políticas son libres, gusten máis ou menos, pero iso non xustifica expresións que traspasan certos límites”.

O goberno municipal considera que calquera persoa pode ter un mal día ou cometer un erro, pero hai temas nos que non cabe a banalización: “Non resulta aceptable insultar a un presidente do Goberno, sexa cal sexa a súa cor política, e moito menos facer mofa de dúas realidades tan dolorosas como a explotación sexual das mulleres ou o consumo de drogas”.

Se o grupo non realiza esa rectificación pública ao longo do día de hoxe, o Concello deixará sen efecto o procedemento de contratación e buscará unha alternativa para cubrir a actuación prevista o 19 de agosto.