Axentes do Equipo de Investigación da Garda Civil de Cambados investigan a tres homes, de 40, 46 e 51 anos, veciños da comarca do Salnés, como presuntos autores de catro delitos de roubo con forza e un delito de furto cometidos en diversos inmobles.
A operación iniciouse tras a presentación de cinco denuncias por feitos similares en Cambados, Ribadumia e Meis, nas que se denunciaba a subtracción de maquinaria e ferramentas como desbrozadoras, motoserra, cortacéspede, corta-sebes, compresores, bombas de auga e ferramentas de man.
No transcurso da investigación, os axentes conseguiron recuperar boa parte do material subtraído, parte do cal xa foi identificado e entregado aos seus lexítimos propietarios. Grazas ás xestións realizadas, procedeuse á identificación, localización e imputación dos tres presuntos autores.
As dilixencias serán remitidas ao Xulgado de Garda de Cambados, onde os investigados comparecerán cando sexan citados. Os obxectos recuperados estarán expostos no acuartelamento de Cambados, de luns a venres entre as 08:00 e as 14:00 horas, para que as persoas que teñan denunciado roubos nas súas propiedades poidan identificalos.
