O Concello de Vilagarcía deu un novo paso no Plan de Asfaltados coa licitación do lote 2, que inclúe melloras en puntos clave da cidade como a rotonda do Cavadelo (avenida Valle Inclán) e a rotonda de acceso ao Hospital do Salnés, ademais de outras sete vías situadas en Sobradelo, Faxilde, O Piñeiriño, Trabanca Sardiñeira e O Carril.
O investimento ascende a 330.707 euros e o prazo de execución é de tres meses. As empresas interesadas dispoñen ata o 1 de setembro para presentar as súas ofertas a través da Plataforma de Contratación do Estado.
Segundo recolle o proxecto técnico, moitas destas vías presentan firme esgotado, fendas e socavóns, polo que as actuacións contemplan a extensión dunha nova capa de rodadura, regularización de firme e fresado en zonas necesarias, así como o ensanchado nalgúns puntos. Tamén se renovará e ampliará a rede de pluviais na rúa Marxiada e a de fecais na rúa Feal.
O alcalde, Alberto Varela, destacou que estas obras “responden ás demandas veciñais e supoñen un avance en materia de seguridade viaria en todas as parroquias”.
