A Praza de Ravella acollerá este sábado a VII edición de “Arousa Inspira: Paisaxes de Arte”, organizada pola asociación Arousa Moza en colaboración coa Concellería de Xuventude.
A xornada comezará ás 10:00 horas cunha xincana infantil, na que hai 40 prazas dispoñibles. “A verdade estanse enchendo, polo que animamos ás familias a anotarse xa para non quedar sen sitio”, explicou Borja Santamaría durante a rolda de prensa. As inscricións pódense facer a través dun formulario dispoñible nas redes sociais e na web da asociación.
O concelleiro de Xuventude, Álvaro Carou, destacou que “a proposta contou sempre coa colaboración do Concello porque nos parece estupenda para inculcar os valores de solidariedade e implicación dos máis novos”.
O lema deste ano, “Paisaxes de Arte”, busca potenciar a creatividade dos asistentes e poñer en valor o vínculo entre iniciativas culturais e o patrimonio local, segundo indicou Santamaría. Esta temática rexerá tamén o concurso de fotografía, microrelatos e poesía, cuxas creacións deben enviarse a arousamoza@gmail.com, acompañadas dun pseudónimo. Os gañadores recibirán un vale de 100 euros para gastar no comercio local.
Xa pola tarde, a partir das 16:30 horas, abrirá o stand de arte, “onde nos poderemos relaxar pintando e deixando voar a nosa imaxinación”, explicou Simón Rodríguez, da asociación. Neste espazo tamén haberá un posto con información sobre Arousa Moza.
Ás 17:00 horas terá lugar a mostra de baile das escolas locais de Vilagarcía, e ás 18:00 horas os concertos en directo:
- Isi Vaamonde, con rock 🎸
- Lux L, con música urbana 🎧
- Marcos Handpan, música experimental 🥁
- Xoel Padín, seguido dunha foliada popular aberta a todas as asociacións folclóricas do Salnés 🎵
A actividade ofrece unha xornada cultural, artística e familiar, convidando aos asistentes a desfrutar da creatividade e do patrimonio local en Vilagarcía.
