🔴 𝗠𝗔𝗥𝗜́𝗔 𝗚𝗔𝗟𝗜𝗔𝗡𝗔 𝗖𝗛𝗘𝗚𝗔 𝗔 𝗩𝗜𝗟𝗔𝗚𝗔𝗥𝗖𝗜́𝗔 𝗖𝗢𝗔 𝗢𝗕𝗥𝗔 ‘𝗘𝗨 𝗦𝗢́ 𝗤𝗨𝗘𝗥𝗢 𝗜𝗥𝗠𝗘 𝗔 𝗙𝗥𝗔𝗡𝗖𝗜𝗔’

Vilagarcía recibirá en novembro a visita da recoñecida actriz de teatro e televisión María Galiana, que pasará polo Auditorio Municipal coa obra “Eu só quero irme a Francia”, de Contraproducións S.L. O espectáculo será o sábado 15 de novembro ás 21:00 horas, con entradas xa dispoñibles a través de Ataquilla.com.

A Concellería de Cultura, dirixida por Sonia Outón, leva meses traballando para facer posible a chegada desta montaxe, que promete converterse nun dos grandes eventos culturais do ano en Vilagarcía.

“Se xa contabamos cunha programación de primeiro nivel e moitas confirmacións para o próximo ano, poder anunciar agora esta peza é unha auténtica satisfacción, a guinda do pastel”, sinalou Outón.

A obra narra a historia familiar de Leo e Inés, dous descoñecidos que se atopan no velorio da súa avoa Pilar. O que comeza como un malentendido acaba revelando segredos, identidades entrelazadas e unha viaxe emocional á España da posguerra.

Entre mobles cubertos, un reloxo de cuco que interrompe cada momento incómodo e a presenza do que quedou por dicir, “Eu só quero irme a Francia” preséntase como unha comedia amarga sobre a identidade, o abandono e a herdanza emocional que atravesa xeracións. O humor convértese en defensa ante a dor e, ás veces, irse a Francia non é unha fuxida, senón un acto de liberdade.

A peza, dirixida ao público adulto, ten unha duración de 80 minutos. As entradas teñen un prezo de entre 20 e 23 euros, segundo a zona. No caso de non esgotarse, poderán adquirirse o propio día do espectáculo na billeteira do Auditorio a partir das 19:00 horas.