🔴 𝗩𝗜𝗟𝗔𝗚𝗔𝗥𝗖𝗜́𝗔 𝗟𝗜𝗖𝗜𝗧𝗔 𝗔 𝗛𝗨𝗠𝗔𝗡𝗜𝗭𝗔𝗖𝗜𝗢́𝗡 𝗗𝗘 𝗕𝗢𝗨𝗭𝗔 𝗗𝗘 𝗔𝗕𝗔𝗜𝗫𝗢, 𝗘𝗡 𝗩𝗜𝗟𝗔𝗫𝗢𝗔́𝗡

O Concello de Vilagarcía publicou hoxe a licitación das obras de humanización de Bouza de Abaixo, en Vilaxoán, un proxecto ambicioso que transformará por completo esta zona tan transitada. Cun investimento de 775.000 euros, o plan busca crear un espazo de prioridade peonil e poñer fin aos problemas de desbordamento de auga que se producen nos días de chuvia intensa.

As empresas interesadas terán de prazo ata o 12 de novembro para presentar as súas ofertas a través da Plataforma de Contratación do Estado.

A actuación, moi demandada pola veciñanza, é unha das máis importantes dos vindeiros anos, xa que supón preto do 80% dos fondos do Plan Máis Provincia que lle corresponden ao Concello. “Dende o goberno local apostamos por mellorar os servizos e transformar completamente unha das principais rúas de Vilaxoán”, destacou o alcalde, Alberto Varela.

En total, actuaráse sobre 2.200 metros cadrados, dende a entrada pola Praza de Abastos ata a saída cara á avenida de Cambados. Crearase unha rúa con plataforma única, con empedrado diferenciado nas zonas de maior valor patrimonial —entre Avelina Nogueira e o cruce con Pardiñas, e tamén no cruzamento con Benigno Santos, onde se acondicionará a zona axardinada—. O tráfico rodado quedará restrinxido a residentes, priorizando o uso peonil.

Tamén se aproveitará a obra para renovar todas as instalacións soterradas, separando as redes de saneamento e pluviais, e substituíndo as de baixa tensión, iluminación e telefonía. “O proxecto vai máis alá da estética, xa que poremos fin aos problemas no subsolo”, engadiu o rexedor.

O plan inclúe tamén a renovación do mobiliario urbano, con novos bancos, papeleiras e farois, e contará cun prazo de execución de oito meses.