🔴 O PP DE CAMBADOS ALERTA DAS DIFICULTADES DA POLICÍA LOCAL POLA FALTA DE COMBUSTIBLE NOS VEHÍCULOS MUNICIPAIS

O grupo municipal do Partido Popular de Cambados vén de advertir dunha situación que afecta ao funcionamento da Policía Local, que se viu obrigada a limitar as patrullas en coche pola falta de combustible.

Segundo explican os populares, a empresa subministradora decidiu interromper o servizo debido a retrasos no pago das facturas, polo que os axentes só poden empregar os vehículos en casos de urxencia, reforzando mentres tanto as patrullas a pé.

A voceira do PP, Sabela Fole, sinalou que se trata dunha situación inédita no municipio e pediu ao goberno local que priorice o abono das facturas para restablecer canto antes a normalidade. “É necesario garantir que a Policía Local dispoña dos medios axeitados para atender á veciñanza”, afirmou.

Desde o PP tamén manifestaron a súa preocupación pola posibilidade de que este problema de subministración poida estenderse a outros servizos municipais, polo que reclaman ao executivo que busque unha solución inmediata e dea prioridade ás cuestións básicas de funcionamento.