🔴 ROUBOS DE CABLE AFECTAN AO ALUMEAADO PÚBLICO EN CATOIRA

O Concello de Catoira denunciou ante a Garda Civil dous roubos de cable do alumeado público que se produciron en menos de dez días. Segundo explicou o alcalde, Xoán Castaño, o primeiro furto ocorreu a semana pasada no lugar do Cruceiro de Arón, antes de chegar a Coaxe, onde foron subtraídos 200 metros de cable, afectando á iluminación pública e provocando apagamentos ⚡.

O segundo roubo produciuse na noite de onte no lugar de Freixeiro, en Abalo, onde novamente se levaron outros 200 metros lineais de cable. O alcalde sinala que os danos económicos, entre material subtraído e reparacións, poderían superar os 6.000 euros 💸.

Castaño destacou que, aínda que de momento non se percibe unha sensación de inseguridade, esta reincidencia preocupa ao goberno local. “Non só se trata do custo do cable, senón tamén dos danos nas instalacións e do tempo que o persoal do Concello dedica a reparar as avarías”, apuntou.

Sobre os motivos, o alcalde non descarta que se trate da venda do material ou dunha acción de sabotaxe, e solicitou á Garda Civil que incremente a vixilancia no municipio 👮‍♂️. Tamén apelou á responsabilidade da veciñanza para que avisen de calquera movemento sospeitoso que poida afectar ao alumeado público.

Castaño lembrou que, anteriormente, tamén se produciron outros roubos a particulares e un incidente no Centro Social de Abalo, onde se levaron materiais de pouco valor pero causaron importantes danos ao forzar as portas de seguridade.

O alcalde subliña que estes delitos contra o patrimonio afectan a toda a comunidade e poderían tamén prexudicar a empresas, negocios e ao polígono industrial do municipio ⚠️.