🔴 VILAGARCÍA PRESENTA O PROXECTO DE HUMANIZACIÓN DAS RÚAS ADUANA E CRUZ NO CARRIL

 

O Concello de Vilagarcía de Arousa presentou esta mañá o proxecto de humanización das rúas Aduana e Cruz, situadas no Carril, cun orzamento de 931.166 euros e un prazo de execución de cinco meses. A actuación contempla a creación dunha plataforma única mediante a colocación dun pavimento de granito gris, co obxectivo de mellorar a accesibilidade e o tránsito peonil nesta zona emblemática da parroquia.

O proxecto foi presentado polo alcalde, Alberto Varela, e a concelleira de Urbanismo, Paola María, quen destacaron que se trata dunha intervención “moi esperada polos veciños e veciñas do Carril”.

“O ano 2026 será moi importante para Carril, non só por este proxecto tan demandado, senón tamén polas actuacións na rúa Esperanza ou a mellora do saneamento que se está levando a cabo xa na avenida Rosalía de Castro”, sinalou o rexedor.

🧱 As obras incluirán a demolición das beirarrúas actuais e parte do pavimento existente, elevando o nivel da rúa para que o acceso ás vivendas resulte máis cómodo.

“A plataforma única partirá da altura á que se atopan as beiravías, polo que se alzará o nivel da rúa. Ademais, reforzarase o firme para evitar roturas co paso dos vehículos”, explicou Paola María.

O novo pavimento estará formado por entre 12 e 15 centímetros de granito sobre formigón dun grosor similar, e a velocidade de circulación limitarase a 10 km/h.

💡 Ademais, o proxecto contempla a renovación integral dos servizos soterrados, incluíndo saneamento, pluviais e abastecemento, así como unha nova iluminación de fachada con tecnoloxía LED, que permitirá “un menor consumo e un maior rendemento lumínico”, engadiu a concelleira.

A intervención abranguerá 2.200 metros cadrados, e comprenderá tamén as travesías que conectan ambas rúas coa rúa do Carmen, adoptando unha estética similar á desta última.

“Estamos ante un espazo senlleiro do Carril, polo que o aspecto final debe ser acorde ao entorno e aos edificios históricos que alí se atopan, como o da Aduana ou o da Confraría de Pescadores”, apuntou Varela.

🏗️ O proxecto financiarase con parte dos 3,8 millóns de euros dos fondos EDIL (Estratexia de Desenvolvemento Integrado Local) conseguidos polo Concello nesta convocatoria, e tamén será presentado ao Plan Extra da Deputación de Pontevedra, segundo acordou a Xunta Local de Goberno.

“Unha vez se resolva este procedemento, que esperamos que sexa con dilixencia, poderemos sacala a licitación para executala o vindeiro ano”, concluíu o alcalde.