🔴 𝐎 𝐂𝐎𝐍𝐂𝐄𝐋𝐋𝐎 𝐃𝐄 𝐕𝐈𝐋𝐀𝐆𝐀𝐑𝐂𝐈́𝐀 𝐏𝐑𝐄𝐂𝐈𝐍𝐓𝐀 𝐃𝐔́𝐀𝐒 𝐍𝐀𝐕𝐄𝐒 𝐃𝐀 𝐎𝐏𝐏-𝟖𝟗 𝐍𝐎 𝐏𝐄𝐈𝐑𝐀𝐎 𝐃𝐎 𝐑𝐀𝐌𝐀𝐋

 🔴 O Concello de Vilagarcía emitiu á última hora de onte unha orde de precinto das naves A e B do peirao do Ramal, onde a Organización de Produtores 𝐏𝐚𝐫𝐪𝐮𝐢𝐬𝐭𝐚𝐬 𝐝𝐞 𝐂𝐚𝐫𝐫𝐢𝐥 (𝐎𝐏𝐏-𝟖𝟗) continuaba desenvolvendo tarefas de clasificación e rexistro de moluscos sen os preceptivos permisos municipais.

🔴 A medida, amparada no artigo 152 da Lei do Solo de Galicia, motívase polo incumprimento da suspensión da actividade ordenada por resolución da Alcaldía do 5 de setembro de 2025, así como polos informes de inspección e seguimento da Policía Local realizados na última semana, concretamente os días 5 e 9 de decembro.

🔴 Tal e como xa se comunicara tanto á Autoridade Portuaria como aos propios parquistas, non se poden realizar labores de clasificación e rexistro de moluscos nas concesións do Ramal ata dispoñer das licenzas urbanísticas do Concello e contar coa conformidade municipal de inicio de actividade económica e/ou apertura da nave.

🔴 Ningún destes requisitos se materializou nos últimos tres meses. De feito, a comunicación previa presentada pola 𝐎𝐏𝐏-𝟖𝟗 para a apertura dunha nave foi declarada “ineficaz” pola administración municipal, ao non vincularse estas actividades co tráfico marítimo, conforme ao Plan Especial do Porto de Vilagarcía, ao Plan de Utilización dos Espazos Portuarios e á Lei de Portos do Estado e da Mariña Mercante.

🔴 Ademais, a actividade descrita na memoria presentada non se correspondía coa recollida na autorización da concesión administrativa do Porto e, en todo caso, calquera autorización quedaría igualmente supeditada á obtención dos permisos urbanísticos municipais, condición indispensable para o exercicio da actividade.