🔴 𝐎𝐒 𝐓𝐑𝐀𝐁𝐀𝐋𝐋𝐀𝐃𝐎𝐑𝐄𝐒 𝐃𝐄 𝐄𝐌𝐄𝐑𝐗𝐄𝐍𝐂𝐈𝐀𝐒 𝐃𝐄 𝐒𝐀𝐍𝐗𝐄𝐍𝐗𝐎 𝐃𝐄𝐍𝐔𝐍𝐂𝐈𝐀𝐍 𝐎 𝐏𝐋𝐀𝐍 𝐃𝐎 𝐂𝐎𝐍𝐂𝐄𝐋𝐋𝐎, 𝐍𝐀 𝐃𝐄𝐒𝐈𝐍𝐅𝐎𝐑𝐌𝐀𝐂𝐈𝐎́𝐍

 🔴 Os traballadores do Servizo de Emerxencias de Sanxenxo amosan o seu profundo malestar tras a publicación dunha serie de informacións que cualifican de falsas, manipuladas e interesadas, en relación coa decisión do Concello de pechar o servizo en horario nocturno fóra da tempada turística. Sinalan directamente ao alcalde, 𝐓𝐞𝐥𝐦𝐨 𝐌𝐚𝐫𝐭𝐢́𝐧, como responsable dunha nova manobra de acoso laboral.

🔴 Segundo explican, a decisión de suprimir a atención nocturna xa estaba tomada de antemán e foi comunicada aos traballadores sen negociación real, pese a tratarse dunha modificación substancial das condicións laborais que, por lei, debía ser pactada. A “negociación”, denuncian, foi un simple paripé.

🔴 O argumento empregado polo goberno local, difundido por varios medios, foi que o exercicio de dereitos laborais como vacacións ou días libres estaba a provocar problemas organizativos. Os traballadores rexeitan esta versión e aseguran que o verdadeiro motivo é o rexeitamento do alcalde a pagar gardas nocturnas, que cualifica de “durmir”, amosando —din— un absoluto descoñecemento do traballo de emerxencias.

🔴 En relación cos datos ofrecidos á prensa, critican o uso torticeiro da estatística segundo a cal só un 10% das emerxencias se produciron en horario nocturno, ocultando que se atenderon máis de 140 intervencións reais, incluíndo incendios en vivendas ou rescates en accidentes de tráfico.

🔴 Durante o proceso, os representantes dos traballadores chegaron a presentar unha planificación anual con tres efectivos por quenda, renunciando incluso á libre elección de días de asuntos propios e deixando marxe ao Concello para cubrir imprevistos. A proposta foi rexeitada.

🔴 Denuncian tamén a amortización da praza de xefe de servizo, deixando emerxencias sen dirección técnica e obrigando a unha autoxestión forzada. Ademais, consideran irregular o nomeamento do xefe da Policía Local como máximo responsable da seguridade municipal, decisión que se atopa xudicializada.

🔴 No transcurso das reunións, os traballadores chegaron a ofrecer reducións nas retribucións por reforzos e gardas extraordinarias, a petición do concelleiro de Seguridade, 𝐗𝐨𝐚́𝐧 𝐏𝐞́𝐫𝐞𝐳, medidas que posteriormente —aseguran— foron utilizadas en contra deles nos medios.

🔴 Fronte ás acusacións sobre supostos salarios elevados, achegan como proba unha nómina real dun compañeiro con máis de 20 anos de antigüidade, cun soldo que cualifican de precario para un profesional con cualificación de bombeiro e formación especializada en múltiples ámbitos de emerxencias, costeada co seu tempo libre e recursos propios.

🔴 Os traballadores convidan aos concelleiros a facer públicas as súas nóminas de media xornada, así como a súa formación e cualificación profesional, en resposta ás críticas vertidas contra o persoal de emerxencias.

🔴 Finalmente, lamentan que, tras semanas de reunións, o Concello comunicase o peche nocturno apenas horas despois do último encontro, trasladando xa a decisión aos medios, aos concellos limítrofes e aos propios traballadores, o que consideran a proba definitiva de que nunca existiu vontade de acordo.

🔴 A partir de xaneiro, advirten, cada emerxencia non atendida durante a noite terá un único responsable político. Os traballadores confían en que a xustiza volva poñer no seu sitio ao alcalde 𝐓𝐞𝐥𝐦𝐨 𝐌𝐚𝐫𝐭𝐢́𝐧, mentres denuncian o desmantelamento progresivo dun servizo que foi referente en Galicia.