A PAFIF da Guardia Civil de Vilagarcía de Arousa levou a cabo, o pasado martes 2 de decembro, unha intervención despois de recibir a denuncia dun cidadán que alertaba dunha venda fraudulenta de gasóleo bonificado nunha estación de servizo en Campo Lameiro.
Tras varias vixilancias discretas, os axentes desprazáronse á estación e localizaron, nunha finca anexa, un camión cisterna dado de baixa na D.G.T., que se utilizaba como depósito ilegal. No seu interior atoparon 2.050 litros de gasóleo B e 300 litros de gasóleo C.
Ademais, nun anexo da propia estación, os axentes atoparon un depósito clandestino de 1.500 litros de capacidade, que contiña 1.000 litros de gasóleo B.
Dado que a estación só estaba autorizada para a venda de gasóleo A, procederon á extracción de mostras e ao precintado dos depósitos, aprehendendo un total de 3.050 litros de gasóleo B e 300 litros de gasóleo C.
