🔴 𝐀 𝐏𝐎𝐋𝐈𝐂Í𝐀 𝐋𝐎𝐂𝐀𝐋 𝐃𝐄 𝐕𝐈𝐋𝐀𝐆𝐀𝐑𝐂ÍA 𝐃𝐄𝐍𝐔𝐍𝐂𝐈𝐀 𝐀 𝐔𝐍 𝐋𝐎𝐂𝐀𝐋 𝐃𝐎 𝐂𝐀𝐒𝐓𝐑𝐎 𝐏𝐎𝐑 𝐆𝐑𝐀𝐕𝐄𝐒 𝐈𝐑𝐑𝐄𝐆𝐔𝐋𝐀𝐑𝐈𝐃𝐀𝐃𝐄𝐒

 🔴 A Policía Local de Vilagarcía vén de denunciar un local situado no Castro tras detectar numerosas irregularidades durante unha inspección. Agora serán os servizos xurídicos e técnicos os encargados de avaliar os feitos recollidos na denuncia, que poderían derivar nunha sanción económica e mesmo no peche temporal do establecemento.

🔴 A actuación inscríbese na campaña de inspeccións que a Policía Local vén desenvolvendo nos últimos meses nos locais de hostalería do municipio, co obxectivo de garantir o cumprimento da normativa vixente e a seguridade de clientes e veciñanza.

🔴 No caso concreto deste establecemento, os axentes comprobaron que non había licenza á vista, como é obrigatorio. Ademais, detectouse a venda de vapeadores sen autorización, a existencia dunha máquina comecartos sen a carteleira esixida e extintores de incendios caducados dende o ano 2018.

🔴 A maiores, o responsable do negocio non presentou nin a licenza de apertura nin a póliza de seguro e chegou a negarse a que continuase a inspección, un feito especialmente sancionado pola Lei de Espectáculos Públicos.

🔴 O goberno local fai un chamamento aos empresarios do sector para que cumpran coas normas e respecten tanto os dereitos da veciñanza ao descanso como os dos seus propios clientes como consumidores. Dende o concello recoñécese o papel fundamental da hostalería no dinamismo económico da cidade, lembrando que a inmensa maioría dos empresarios si cumpre.

🔴 Precisamente por iso, insístese en que esa minoría que non respecta os horarios, excede os niveis de ruído ou de aforo, ou incumpre medidas básicas de seguridade, como ter os extintores caducados, debe saber que estas condutas teñen consecuencias, incluíndo sancións económicas e mesmo o precinto do local. “Os que deben preocuparse polas inspeccións son os que non cumpren”, conclúe o goberno local