🔴 O 112 CHAMA Á PRUDENCIA NO VERÁN: CALOR, PRAIAS, RÍOS E FESTIVAIS CENTRAN AS PRINCIPAIS RECOMENDACIÓNS DE SEGURIDADE

🔴 As altas temperaturas, o incremento das actividades de baño e a celebración de festas e festivais converten o verán nunha época na que é necesario extremar as precaucións. Con esta mensaxe, o 112 Galicia lembra a importancia da autoprotección para evitar accidentes, unha recomendación especialmente relevante nunha comarca como O Salnés, onde durante os meses estivais se multiplica a chegada de visitantes e a actividade nas praias, portos, piscinas e eventos ao aire libre.

🔴 CALOR: HIDRATACIÓN E PROTECCIÓN

O servizo de emerxencias advirte de que as vagas de calor poden ter unha importante incidencia na saúde, especialmente entre as persoas maiores, os menores e os doentes crónicos. Por iso, recomenda manter unha hidratación constante, priorizar o consumo de auga, froitas e verduras, evitar o alcohol e as bebidas con exceso de azucre, non expoñerse ao sol nas horas centrais do día e utilizar roupa lixeira, gorras e protección solar.

Tamén lembra a importancia de manter as vivendas frescas, aproveitando as primeiras horas da mañá para ventilar, e reservar a práctica de exercicio físico para os momentos do día nos que as temperaturas sexan máis suaves.

🔴  MÁXIMA PRECAUCIÓN NA AUGA

O 112 fai fincapé nos riscos asociados ao baño, unha actividade moi habitual nestas datas nas praias de Sanxenxo, O Grove, A Illa de Arousa, Vilanova,  ou Vilagarcía, así como nos ríos e piscinas particulares.

As recomendacións pasan por supervisar de forma permanente os menores, bañarse sempre en zonas autorizadas e evitar entrar bruscamente na auga despois dunha exposición prolongada ao sol para previr un posible choque térmico.

No caso do mar, lembra que é fundamental respectar as bandeiras, non afastarse da costa e, se unha corrente de resaca impide regresar á beira, nadar en paralelo á praia ata saír dela, evitando loitar directamente contra a corrente.

Ademais, advirte do perigo de lanzarse á auga desde rochas ou pontes sen comprobar previamente a profundidade, así como da falsa sensación de seguridade que poden transmitir flotadores ou colchóns inchables, especialmente cando hai vento.

O organismo tamén desaconsella o baño en pozas, encoros ou canles illadas sen asistencia, xa que adoitan presentar fondos irregulares, cambios bruscos de profundidade e dificultades para a intervención dos servizos de emerxencias.

🔴  FESTIVAIS E EVENTOS MULTITUDINARIOS

Coa intensa programación festiva que vive O Salnés durante o verán, o 112 lembra tamén unha serie de recomendacións para asistir a concertos, verbenas e festivais.

Aconsella manterse hidratado, identificar as saídas de emerxencia ao chegar ao recinto, seguir sempre as indicacións da organización e das forzas de seguridade e non volver nunca atrás no caso dunha evacuación.

Tamén recomenda establecer un punto de encontro co resto do grupo, levar o teléfono móbil completamente cargado e extremar a atención sobre os menores, os que se lles pode colocar unha pulseira identificativa cun número de contacto.

➡️ Desde o 112 insisten en que pequenos xestos de prevención poden evitar situacións de risco e contribuír a que o verán transcorra con seguridade tanto para a veciñanza como para os milleiros de visitantes que cada ano elixen O Salnés como destino turístico.