🔴 𝟐𝟐 𝐂𝐀𝐍𝐒 𝐄𝐍 𝐏É𝐒𝐈𝐌𝐀𝐒 𝐂𝐎𝐍𝐃𝐈𝐂𝐈Ó𝐍𝐒 𝐇𝐈𝐗𝐈É𝐍𝐈𝐂𝐎-𝐒𝐀𝐍𝐈𝐓𝐀𝐑𝐈𝐀𝐒 𝐄𝐍 𝐌𝐎𝐀Ñ𝐀

🔴 Axentes do SEPRONA de Cangas procederon ao decomiso preventivo de 22 cans tras recibir un aviso da Protectora de Animais do Morrazo alertando da situación na que se atopaban varios animais nunha vivenda do municipio. Segundo a información trasladada, había un número elevado de cans nun espazo moi reducido e procedía do lugar un cheiro moi forte, o que fixo sospeitar do seu estado.

🔴 Tras realizar a inspección do lugar, en presenza do fillo do propietario dos animais —quen explicou que o seu pai se atopa ingresado no hospital e que o coidado dos cans recaía noutro familiar—, os axentes localizaron os animais nun galpón situado na parte traseira da vivenda, onde se almacenaban varios enseres. Nunha zona dividida dese espazo atopábanse 22 cans da raza podenco.

🔴 Durante a inspección comprobouse que varios deles estaban encadeados con cadeas de escasa lonxitude, o que lles limitaba notablemente a mobilidade. En total había 16 femias e 6 machos, dos cales 13 non estaban identificados con microchip. A maioría presentaban signos evidentes de padecer sarna, e tamén se detectaron varias femias con indicios de ter parido recentemente.

🔴 Ante esta situación sanitaria considerada irregular, os axentes decidiron trasladar preventivamente os animais ao centro de acollida concertado polo Concello, a Protectora do Morrazo, onde recibirán os tratamentos veterinarios necesarios.

🔴 O SEPRONA continúa realizando xestións cos familiares do propietario para esclarecer a tenza legal desta cantidade de cans, a súa identificación obrigatoria con microchip, as condicións de insalubridade nas que se atopaban e a cría indiscriminada de femias. Ademais, elaborarase o correspondente informe que será remitido ás autoridades competentes en materia de benestar animal.