🔴 𝐎 𝐒𝐀𝐋𝐍𝐄́𝐒 𝐃𝐄𝐒𝐀𝐑𝐓𝐈𝐂𝐔𝐋𝐀𝐃𝐀 𝐔𝐍𝐇𝐀 𝐈𝐌𝐏𝐎𝐑𝐓𝐀𝐍𝐓𝐄 𝐑𝐄𝐃𝐄 𝐃𝐄 𝐍𝐀𝐑𝐂𝐎𝐓𝐑𝐀́𝐅𝐈𝐂𝐎 𝐂𝐎𝐍 𝟏𝟏 𝐃𝐄𝐓𝐈𝐃𝐎𝐒

🔴 A Garda Civil e a Policía Nacional veñen de desarticular unha importante organización criminal dedicada ao tráfico de drogas con base no Salnés, nunha operación conxunta que se saldou con 11 detidos. Todos eles son varóns de entre 41 e 52 anos, con antecedentes, e veciños de distintas localidades como Caldas de Reis, A Illa de Arousa, Vilanova, Vilagarcía, Pontevedra, Porto do Son e Bilbao.

🔴 A denominada operación HELO/KALIDAS iniciouse en maio de 2024 tras diversas investigacións policiais. Un dos momentos clave produciuse en outubro de 2025, cando se interceptou un vehículo en Ribadeo con 10 quilos de droga ocultos nun dobre fondo. A raíz deste operativo, realizouse un rexistro domiciliario no que se incautaron importantes cantidades de heroína, cocaína e haxix, ademais de teléfonos satelitais.

🔴 Durante a fase final da operación practicáronse 12 rexistros simultáneos, dous deles en Bilbao, nos que se interviñeron máis de 40 quilos de substancias estupefacientes, preto de 20.000 euros en efectivo, armas de fogo —incluíndo pistolas, un revólver e varias escopetas—, abundante munición, vehículos, dispositivos electrónicos e dúas embarcacións de alta velocidade preparadas para o transporte de droga.

🔴 En total, a operación permitiu retirar do mercado 5,5 quilos de heroína, 20,5 quilos de cocaína, 15,1 quilos de haxix e 2 quilos de substancia de corte. Ademais, os axentes localizaron un punto de almacenamento da organización onde tamén se gardaban estupefacientes.

🔴 As detencións realizáronse en diferentes puntos do territorio nacional, como León, Bilbao, Vigo ou Vilagarcía, e supoñen a desarticulación dun entramado que operaba tanto a nivel autonómico como estatal. O Xulgado de Caldas de Reis decretou o ingreso en prisión dun dos principais implicados.