🔴 𝐀 𝐏𝐑𝐎𝐌𝐎𝐂𝐈Ó𝐍 𝐃𝐎𝐒 𝐄𝐒𝐏𝐔𝐌𝐎𝐒𝐎𝐒 𝐄 𝐀 𝐂𝐀Í𝐃𝐀 𝐍𝐎 𝐂𝐎𝐍𝐒𝐔𝐌𝐎 𝐃𝐄 𝐕𝐈Ñ𝐎 𝐂𝐄𝐍𝐓𝐑𝐀𝐍 𝐎 𝐂𝐎𝐍𝐒𝐄𝐋𝐋𝐎 𝐃𝐄 𝐀𝐃𝐌𝐈𝐍𝐈𝐒𝐓𝐑𝐀𝐂𝐈Ó𝐍 𝐃𝐄 𝐑𝐄𝐂𝐄𝐕𝐈𝐍 𝐄𝐍 𝐈𝐓𝐀𝐋𝐈𝐀 🍷🍾🇪🇺

🔴 O concelleiro de Enoturismo de Cambados, 𝐉𝐨𝐬é 𝐑𝐚𝐦ó𝐧 𝐀𝐛𝐚𝐥, explicou tras o Consello de Administración de RECEVIN celebrado en Pramaggiore que unha das principais preocupacións compartidas polas organizacións vitivinícolas de España, Portugal, Francia e Italia é a caída continuada do consumo de viño. Segundo indicou, os novos hábitos de vida saudables, o menor consumo entre a mocidade e determinadas políticas restritivas impulsadas pola Unión Europea están a provocar un descenso que preocupa especialmente aos territorios produtores, polo que RECEVIN acordou trasladar esta inquietude ás institucións comunitarias.

🔴 Baixo a presidencia de 𝐀𝐧𝐠𝐞𝐥𝐨 𝐑𝐚𝐝𝐢𝐜𝐚, a entidade impulsará unha nova liña de interlocución coa Comisión Europea e co Parlamento Europeo para defender o papel económico, cultural, social e turístico do viño. O obxectivo é facer chegar ás autoridades europeas a necesidade de apoiar un sector fundamental para moitas rexións e reivindicar o consumo moderado e responsable como parte da cultura e da identidade de numerosos territorios europeos.

🔴 Outro dos acordos destacados foi a creación dunha rede europea de festas do viño para incrementar a promoción internacional destes eventos. Cambados pretende incorporar a esta iniciativa a Festa dos Espumosos, unha cita pola que o Concello quere apostar de maneira especial nos próximos anos. Segundo explicou 𝐉𝐨𝐬é 𝐑𝐚𝐦ó𝐧 𝐀𝐛𝐚𝐥, a intención é aproveitar esta plataforma europea para seguir impulsando a proxección dun produto con gran aceptación e potencial de crecemento. Aínda que a Festa do Albariño tamén formará parte desta promoción, o edil lembrou que xa conta co recoñecemento de Festa de Interese Turístico Internacional e cunha importante visibilidade consolidada.

🔴 Cambados participou na reunión representando a España xunto con Vilafranca del Penedès e Cariñena. 𝐉𝐨𝐬é 𝐑𝐚𝐦ó𝐧 𝐀𝐛𝐚𝐥 destacou ademais o valor simbólico da visita a Pramaggiore, xa que foi precisamente nesta localidade italiana onde, no ano 2016, comezou a fraguarse a candidatura que levaría a Cambados a converterse en Cidade Europea do Viño 2017, un fito que marcou un antes e un despois na proxección internacional da vila e do conxunto da comarca do Salnés. 🍇🌍