🔴 𝗔 𝗖𝗜𝗚 𝗖𝗢𝗡𝗩𝗢𝗖𝗔 𝗨𝗡𝗛𝗔 𝗠𝗢𝗕𝗜𝗟𝗜𝗭𝗔𝗖𝗜Ó𝗡 𝗣𝗢𝗟𝗢 𝗖𝗢𝗡𝗩𝗘𝗡𝗜𝗢 𝗩𝗜𝗧𝗜𝗩𝗜𝗡Í𝗖𝗢𝗟𝗔 𝗡𝗢 𝗗Í𝗔 𝗚𝗥𝗔𝗡𝗗𝗘 𝗗𝗔 𝗙𝗘𝗦𝗧𝗔 𝗗𝗢 𝗔𝗟𝗕𝗔𝗥𝗜Ñ𝗢

🔴 A CIG levará as súas reivindicacións ao escenario de maior proxección da Festa do Albariño de Cambados. O sindicato anunciou a convocatoria dunha mobilización para o 2 de agosto, coincidindo coa xornada grande da celebración, día no que ten lugar o Capítulo Serenísimo, a investidura das Damas e Cabaleiros do Albariño e a presenza de numerosas autoridades e representantes institucionais.

🔴 A decisión foi adoptada nunha asemblea de persoas traballadoras da industria vitivinícola celebrada en Cambados. A CIG reclama a constitución inmediata da mesa de negociación do convenio colectivo provincial, paralizado dende o ano 2014, e denuncia que a patronal continúa sen mostrar vontade de negociar unhas condicións laborais e salariais acordes coa importancia dun sector estratéxico para O Salnés.

🔴 A central sindical asegura que a situación do persoal é insostible, con salarios que nalgúns casos non superan o Salario Mínimo Interprofesional, un abuso da contratación mediante ETT e dos contratos fixos-descontinuos e pensións moi reducidas para o persoal do campo. A representante da FGAMT-CIG, Mar Vila, denuncia unha “infravaloración absoluta” do traballo das persoas que fan posible todo o proceso, dende o coidado das viñas ata a elaboración e comercialización do viño.

🔴 Coa concentración prevista para o día grande da Festa do Albariño, a CIG pretende aproveitar a máxima visibilidade do evento para reclamar á patronal que sente a negociar un novo convenio e facer chegar as súas demandas ás autoridades e ás milleiros de persoas que se darán cita en Cambados durante a principal xornada da festa.