🔴 𝗔 𝗔𝗡𝗣𝗔 𝗔 𝗫𝗨𝗡𝗤𝗨𝗘𝗜𝗥𝗔 𝗖𝗢𝗡𝗩𝗢𝗖𝗔 Á𝗦 𝗙𝗔𝗠𝗜𝗟𝗜𝗔𝗦 𝗔 𝗨𝗡𝗛𝗔 𝗖𝗢𝗡𝗖𝗘𝗡𝗧𝗥𝗔𝗖𝗜Ó𝗡 𝗔𝗡𝗧𝗘𝗦 𝗗𝗔 𝗥𝗘𝗨𝗡𝗜Ó𝗡 𝗖𝗢𝗡 𝗜𝗡𝗦𝗣𝗘𝗖𝗖𝗜Ó𝗡 𝗣𝗔𝗥𝗔 𝗗𝗘𝗙𝗘𝗡𝗗𝗘𝗥 𝗔𝗦 𝗟𝗜Ñ𝗔𝗦 𝗗𝗘 𝗜𝗡𝗙𝗔𝗡𝗧𝗜𝗟

🔴 A ANPA A Xunqueira convocou ás familias do CEIP A Lomba e ao conxunto da comunidade educativa a unha concentración que terá lugar este mércores, 15 de xullo, ás 10:15 horas, diante do edificio administrativo de Campolongo, en Pontevedra, como mostra de rexeitamento ás decisións adoptadas pola Consellería de Educación respecto ao futuro das aulas de Educación Infantil no centro.

🔴 A mobilización celebrarase media hora antes da reunión prevista entre representantes da comunidade educativa, a Inspección Educativa e a Xefatura Territorial. Segundo explica a ANPA, o obxectivo é trasladar o desacordo coa supresión dunha praza de mestra de Infantil, xa oficial, así como coa eliminación dunha aula de 4º de Infantil para o curso 2026/2027 e coa aprobación dun novo catálogo educativo que contempla a supresión de dúas docentes máis no curso 2027/2028.

🔴 A asociación lembra que, tras coñecer estas decisións o pasado 30 de xuño, iniciou unha campaña informativa e mantivo reunións cos grupos políticos con representación no Concello de Vilagarcía para solicitar o seu apoio e defender o mantemento das liñas educativas e do profesorado. Tamén participaron en encontros coa dirección do centro para analizar as consecuencias destas medidas.

🔴 A ANPA advirte de que a redución de unidades e de persoal docente non afectará unicamente ao alumnado de Infantil, senón que terá repercusións en todo o centro, ao diminuír os recursos educativos, os apoios ao alumnado con necesidades específicas e a calidade do ensino nos vindeiros anos. Por este motivo, anima ás familias a participar na concentración para reclamar que se revisen as decisións adoptadas pola Administración educativa.

#vilagarcía #ceipalomba #anpaaxunqueira #educación #infantil #ensinopúblico #familias #pontevedra #galicia