𝗢 𝗕𝗡𝗚 𝗗𝗘𝗡𝗨𝗡𝗖𝗜𝗔 𝗤𝗨𝗘 𝗩𝗜𝗟𝗔𝗚𝗔𝗥𝗖Í𝗔 𝗠𝗔𝗡𝗧É𝗡 𝗣𝗘𝗖𝗛𝗔𝗗𝗔𝗦 𝟰𝟭 𝗣𝗥𝗔𝗭𝗔𝗦 𝗗𝗔 𝗖𝗔𝗦𝗔 𝗗𝗢 𝗠𝗔𝗥 𝗠𝗘𝗡𝗧𝗥𝗘𝗦 𝗖𝗥𝗘𝗖𝗘 𝗔 𝗡𝗘𝗖𝗘𝗦𝗜𝗗𝗔𝗗𝗘 𝗗𝗘 𝗔𝗣𝗔𝗥𝗖𝗔𝗠𝗘𝗡𝗧𝗢

 🔴 O BNG de Vilagarcía considera “incomprensible” que se manteñan pechadas as 41 prazas de aparcamento da parcela da Casa do Mar, especialmente cando nas inmediacións se está a construír o novo centro de saúde da cidade.

🔴 A formación nacionalista asegura que unha resposta do Goberno central a unha pregunta formulada no Senado confirma que a Tesourería Xeral da Seguridade Social, titular do inmoble, non recibiu ningunha solicitude formal nin proposta de negociación por parte do Concello de Vilagarcía para habilitar estas prazas para uso público.

🔴 Segundo o BNG, o único que consta ante a Administración estatal é a comunicación, en marzo de 2025, do acordo plenario que instaba a iniciar negociacións. Desde entón, sinala a resposta oficial, non se tería presentado ningunha iniciativa para concretar as condicións do acordo.

🔴 Os nacionalistas consideran que existe unha dobre responsabilidade: por unha banda, reclaman ao Estado que estude fórmulas para permitir o uso público do aparcamento e, pola outra, esixen ao Concello que cumpra o acordo aprobado polo Pleno e formalice as negociacións.

🔴 O obxectivo sería permitir o uso das prazas nas tardes dos días laborables e durante as fins de semana, cando a actividade ordinaria da Casa do Mar é menor. O BNG lembra que esta posibilidade xa fora debatida anteriormente e que durante anos o espazo estivo dispoñible nesas franxas horarias.

🔴 A formación nacionalista considera que a cuestión cobra especial importancia coa construción do novo centro de saúde, que incrementará a actividade nunha zona na que o estacionamento xa é unha necesidade para veciñanza e usuarios.

🔴 “Non abonda con aprobar acordos no Pleno: hai que traballar para facelos realidade”, sinalan desde o BNG, que reclama ao Concello que presente formalmente unha proposta ante a Tesourería Xeral da Seguridade Social e o Instituto Social da Mariña.

🔴 O BNG tamén admite que a apertura do aparcamento pode requirir adaptacións nos sistemas de acceso e seguridade, así como modificacións nos contratos de vixilancia e mantemento. Precisamente por iso, reclama que as distintas administracións se senten a negociar e estuden as condicións necesarias para facer compatible o uso público das prazas co funcionamento das instalacións.

🔴 “Se hai dificultades técnicas, administrativas ou económicas, o que corresponde é poñelas enriba da mesa e buscar solucións, non limitarse a pechar a porta”, sosteñen os nacionalistas.

🔴 O BNG reclama así activar de inmediato as negociacións, estudar unha fórmula de apertura polas tardes e as fins de semana e analizar as adaptacións necesarias para garantir a seguridade e o correcto funcionamento do recinto.

🔴 “Vilagarcía non pode permitirse ter prazas de aparcamento pechadas e sen uso cando a cidade necesita máis estacionamento e cando, ademais, estamos ás portas da apertura dun novo centro de saúde”, conclúe a formación nacionalista.