🔴 𝐓𝐎𝐔𝐑𝐈𝐒 𝐏𝐎𝐍 𝐄𝐍 𝐌𝐀𝐑𝐂𝐇𝐀 𝐔𝐍 𝐍𝐎𝐕𝐎 𝐏𝐑𝐎𝐆𝐑𝐀𝐌𝐀 𝐃𝐄 𝐕𝐈𝐒𝐈𝐓𝐀𝐒 𝐆𝐔𝐈𝐀𝐃𝐀𝐒 Á 𝐄𝐒𝐓𝐀𝐂𝐈Ó𝐍 𝐅𝐈𝐓𝐎𝐏𝐀𝐓𝐎𝐋Ó𝐗𝐈𝐂𝐀 𝐀𝐑𝐄𝐄𝐈𝐑𝐎

🔴 Tras o éxito da apertura dos xardíns da Estación Fitopatolóxica Areeiro, o Deputado Javier Touris, acaba de activar un novo programa de visitas guiadas ao centro de investigación agroforestal da Deputación Pontevedra

🔴 As instalacións de O Areeiro abren ao público co fin de que a cidadanía coñeza tanto o traballo que se está a facer nelas como os seus xardíns. Nas súas case seis hectáreas de superficie, conta con plantacións piloto de froiteiros, a colección de camelias da Deputación (con máis de mil exemplares), a primeira plantación de té de Galicia, un xardín de aromáticas e outras especies vexetais de interese.

🔴 As visitas poden ser solicitadas por todas as persoas interesadas, mediante o formulario dispoñible na páxina web de Areeiro, con polo menos dous días de antelación. No caso de menores, deben estar acompañados por un adulto e contar coa autorización correspondente, especialmente no caso de visitas escolares. Se algún participante ten mobilidade reducida, debe indicarse ao enviar o formulario, e recoméndase contactar a través do correo electrónico de Areeiro para avaliar as necesidades de apoio.

As visitas son gratuitas e están abertas a grupos de entre 2 e 30 persoas. Serán conducidas por guías turísticos habilitados e realizaranse de luns a venres de 9:00 a 14:00 horas, e os sábados de 10:00 a 14:00 horas, cunha duración aproximada de dúas horas. Só se permitirá unha visita por persoa ou grupo ao ano.

A Estación Fitopatolóxica Areeiro é un centro de referencia nacional e internacional en sanidade vexetal, investigación e experimentación de cultivos forestais, agrícolas e ornamentais como a camelia, así como na defensa e conservación do patrimonio vexetal provincial. Conta con laboratorios dedicados ao diagnóstico e investigación de pragas e enfermidades vexetais, edafoloxía e estudos de cultivos.