🔴 O PP DE VILAGARCÍA DENUNCIA O ABANDONO DAS INSTALACIÓNS DE ATLETISMO DE FONTECARMOA

🔴 O grupo municipal do Partido Popular denuncia o abandono absoluto no que se atopan as instalacións de atletismo de Fontecarmoa. Tras visitar a zona deportiva coa agrupación atlética Mazí, a formación é coñecedora de primeira man de todos os problemas cos que se atopan os deportistas de Vilagarcía.

Os populares denuncian a desidia do goberno local á hora de coidar as instalacións, especialmente evidente nas pistas de atletismo. Segundo o PP, a pista necesita unha adecuación integral para cumprir cos requisitos de homologación de competicións oficiais, pero actualmente está sucia e con musgo, sen que o goberno local tome medidas salvo limpar unha curva, ignorando o resto da pista. “Esta falta de actuación demostra a desidia e a falta de interese do goberno local por ter unhas pistas de atletismo en perfectas condicións”, sinala a portavoz, Ana Granxa.

Desde o Partido Popular tamén denuncian a falta de planificación do goberno local á hora de realizar investimentos. Un exemplo é o caso dos deportistas que practican o lanzamento de martelo. O goberno investiu 40 mil euros nunha xaula, pero o chan de lanzamento cubriuse con formigón, un material que non cumpre as normas requiridas para este deporte, impedindo así que as instalacións poidan acoller competicións oficiais. “É unha falta de planificación absoluta, investir 40 mil euros na xaula e non comprobar os requisitos deportivos para cubrir o chan cos materiais homologados”, denuncia Granxa.

A falta de mantemento pon en risco aos deportistas da nosa cidade. De feito, debido á suciedade da pista de lanzamento, un mozo resbalou coa xabaleina na man. “Só a sorte e a súa experiencia evitaron unha lesión grave”, advirten os populares.

Pero a gran chapuza do goberno local está nas obras de renovación dos vestiarios dos árbitros e do almacén. En ambas zonas investíronse 50 mil euros, pero o proxecto non se realizou correctamente e a humidade volveu saír, causando graves danos. Os teitos falsos caeron, as paredes están en mal estado e o olor, no caso do vestiario dos árbitros, é insalubre. “Investíronse 50 mil euros en dúas zonas que hoxe volven estar en moi mal estado. É unha gran chapuza, non saben xestionar o diñeiro”, denuncian os populares.

Estas deficiencias non son as únicas nas instalacións. As colchonetas están rotas, as carpas que deberían cubrilas tamén están rotas e non se poden mover, falta o poste para colocar a cámara de vídeo finish, un palco de árbitros rompeuse e non se repuxo, a corda que rodea a pista non está homologada e está rota, e o foso tamén ten o obstáculo roto. “Se revisamos a pista a fondo, seguramente aparecerán moitas máis deficiencias”, indican desde o PP, concluíndo que “moitos destes problemas poderían evitarse cun mantemento continuo das pistas de atletismo. Esta é a situación actual en Vilagarcía, as instalacións deportivas están abandonadas”.