🔴 MISS BOLIVIA, MUCHACHITO BOMBO INFIERNO, THE TYETS, XAVI SARRIÀ E DAKIDARRÍA, ENTRE OUTROS, SÚMANSE AO REVENIDAS, QUE REVELA TAMÉN O CARTEL POR DÍAS

🔴 O festival Revenidas 2024 pecha o seu cartel con novas e destacadas incorporacións. Figuras internacionais como Miss Bolivia, que presentará en directo o seu novo disco *Bestia*, e Muchachito Bombo Infierno, esencial na escena española da música de mestizaxe, estarán presentes en Vilaxoán do 12 ao 15 de setembro. Tamén participarán The Tyets, pioneros do "trapetón" en catalán, e Muyayo Rif, cunha fusión de punk, ska, reggae, latin e rock. Desde Valencia chega Xavi Sarrià, exlíder de Obrint Pas, para o seu derradeiro concerto en Galicia, e desde Cádiz, Trashtucada.

A notable presenza galega inclúe a Rebeliom do Inframundo, que ofrecerán un concerto especial con artistas convidados, Dakidarría, García MC & Nación Quilombo, Mekanika Rolling Band, Uxía Lambona e A Banda Molona, La Yaya Dj e A Duendeneta. De Ninghures e Catuxa Salom protagonizarán os concertos Vibra Mahou, seleccionados a través da colaboración entre Mahou e a Fundación Paideia Galiza.

Revenidas tamén anunciou actividades complementarias en colaboración con Turismo Rías Baixas, como concertos a bordo, gala de circo e roteiros por Vilaxoán, e festas de presentación en varias salas da ría de Arousa. Os abonos para os catro días están á venda por 63€ (+gastos de xestión) en www.revenidas.com, e as entradas por día, a un prezo de 33€ (+gx) o xoves e 38€ (+gx) venres e sábado. A xornada do domingo, con entrada gratuíta, incluirá a tradicional sardiñada popular.

Revenidas ofrece tamén zonas de acampada, cunha opción adicional na Pelada, e 200 abonos cun 15% de desconto para titulares do Carné Xove, en colaboración coa Dirección Xeral de Xuventude da Xunta de Galicia.