🔴 O PP DE CAMBADOS ACUSA AO CONCELLO DE INACCIÓN NA MELLORA DOS COLEXIOS PÚBLICOS A POUCOS DÍAS DO INICIO DO CURSO ESCOLAR

O grupo municipal do Partido Popular (PP) de Cambados esixiu ao Concello que comece de inmediato as obras de mellora e mantemento nos colexios públicos, tarefas que son da súa competencia e que, a só quince días do inicio do curso escolar, previsto para o 11 de setembro, aínda non se iniciaron.

A voceira do PP en Cambados, Sabela Fole, criticou duramente a situación, lembrando que o ano pasado o concelleiro de Educación, Liso González, chegou a pedir desculpas públicas porque o Concello non cumprira coa súa responsabilidade, deixando os colexios en malas condicións no arranque do curso. González atribuíu entón o atraso a “disfuncionalidades propias do cuatripartito”.

Con todo, Fole sinalou que as escusas non son aceptables este ano, xa que os problemas continúan sen resolver. Despois de manter un encontro cos representantes das Asociacións de Nais e Pais de Alumnos (Anpas) e das comunidades educativas, Fole lamentou que só recibiran promesas vagas por parte do Concello, mentres que os centros seguen abandonados. “Vémonos na obriga de demandar unha actuación áxil e inminente ao cuatripartito”, afirmou.

A edil popular tamén destacou que o Concello tiña un convenio coa empresa Bata para realizar tarefas de mantemento nos colexios de maneira mensual, complementadas co traballo do persoal municipal cada seis semanas. Este modelo, que “funcionaba bastante ben”, foi desmantelado polo concelleiro de Obras, José Ramón Abal, que reasignou o persoal a outros proxectos, deixando os centros sen o mantemento necesario.

Fole criticou que Liso González quedou “completamente desautorizado” e demostrou o seu “nulo peso político” no goberno local, lamentando que as escusas do concelleiro ante a situación dos colexios este ano non serán nin cribles nin entendibles polos veciños. Concluíu que, á vista das promesas incumpridas e da falta de accións concretas, os colexios seguen en condicións “moi lonxe das necesidades dos alumnos”, unha situación que, segundo Fole, reflicte o “desastre” no que o cuatripartito ten sumido a Cambados.