🔴 O PP DE CAMBADOS CRITICA A “INEFICACIA” DO CUATRIPARTITO TRAS PERDER CINCO PROXECTOS DE INVESTIMENTO DA XUNTA, INCLUÍDA A CUBERTA DE QUINTÁNS E AS OBRAS NA CÁMARA AGRARIA

O grupo municipal do PP de Cambados, a través da súa voceira Sabela Fole, denunciou a perda de cinco importantes proxectos de investimento que poderían ter sido financiados pola Xunta de Galicia. Segundo Fole, estes proxectos foron rexeitados debido a unha “tremenda e probada ineficacia” do goberno cuatripartito local, que non foi capaz de adaptar as súas propostas ás bases das convocatorias, prexudicando gravemente aos veciños de Cambados.

Entre os proxectos rexeitados destaca a cuberta dunha instalación deportiva en Quintáns, incluída na orde de infraestruturas de Administración Local, pese a que este tipo de actuacións non se subvencionan desde hai anos. Outro exemplo mencionado por Fole é o proxecto para a reforma da antiga Cámara Agraria, que foi presentado ao fondo adicional do Fondo de Cooperación Local (FCL), orientado á eficiencia enerxética. Esta proposta foi modificada para eliminar obras xerais e de accesibilidade que non se axustaban ás bases, pero aínda así foi mal valorada, obtendo só 42 puntos, cando o corte para acceder aos fondos estaba en 82.

Fole lamentou que Cambados teña o “récord” de ser o concello da provincia que máis axudas e subvencións perde. Mencionou tamén que o concello non concursou en outras liñas de financiamento como os fondos Feder, o Fondo de Compensación Ambiental (FCA) e os proxectos estratéxicos da Xunta. A voceira popular criticou que o goberno local, en lugar de rectificar, segue a presentar proxectos mal elaborados, o que provoca que ningunha administración confíe en Cambados para outorgar investimentos.

“Non é só unha cuestión do PP”, destacou Fole, “incluso o delegado do Goberno rexeitou todas as peticións que lle fixo o alcalde durante a súa última visita, incluíndo a incapacidade para retomar as obras do cuartel da Garda Civil”. A edil rematou sinalando que esta situación de ineficacia prolongada está a afectar negativamente ao futuro de Cambados, que ve como as melloras necesarias non chegan debido á incompetencia do goberno municipal.