Un informe xurídico elaborado polo xefe de servizo do Servizo de Asistencia Intermunicipal (SAIM) da Deputación de Pontevedra vén de desbotar as acusacións presentadas por Alberto García, exalcalde socialista de Catoira, contra a secretaria-interventora do Concello por supostos cobros irregulares. O documento cualifica de “nulos de pleno dereito e ineficaces” os argumentos de García, concluíndo que a funcionaria “non está a percibir ingresos indebidos” e, polo tanto, non procede a devolución de ningunha cantidade.
O actual alcalde de Catoira, o nacionalista Xoán Castaño, defendeu dende o principio que as acusacións de García non tiñan fundamento, e agora o informe xurídico abala esta tese. Segundo Castaño, García actúa motivado por “rancor e odio” tras perder o apoio do pobo de Catoira nas últimas eleccións municipais, dedicándose a denunciar ao Concello e perseguir ao seu persoal.
O informe tamén destaca que García tentou modificar os complementos de destino e específico da Secretaria sen seguir os procedementos legais, e sinala que a resolución da Alcaldía e o acordo plenario de 2021 sobre esta modificación son “nulos de pleno dereito”. Ademais, advirte que as accións de García poderían constituír unha “actuación arbitraria prohibida”.
Castaño, pola súa parte, insiste en que o único obrigado a devolver cartos ao Concello de Catoira, segundo a Fiscalía do Tribunal de Contas, é o propio García, afirmando que “pensa o ladrón que todos son da súa condición”.
