🔴 O PP DA ILLA PÍDELLE AO ALCALDE QUE OS DEIXE GOBERNAR SE QUERE SOLUCIONAR O PROBLEMA DA EDAR CON AUGAS DE GALICIA

O alcalde da Illa de Arousa, Luis Arosa, defendeu unha vez máis a prórroga do contrato do servizo da auga, que permitirá ao Concello aportar os 1,7 millóns de euros necesarios para financiar a nova estación depuradora (EDAR). Segundo Arosa, a decisión foi tomada por necesidade, xa que a Xunta de Galicia, gobernada polo PP, non achega “nin un só euro” para un proxecto que considera competencia autonómica. O alcalde tamén criticou que parte da factura do servizo da auga son impostos recadados polo propio Concello e destinados, en teoría, a inversións municipais, pero que non se teñen empregado para ningunha obra de saneamento.

Pola súa parte, o portavoz municipal do PP, Matías Cañón, cargou duramente contra o goberno bipartito, acusándoo de “especulación, venda abusiva e fraude de lei” ao utilizar a prórroga do contrato para financiar a súa parte da depuradora. Cañón advertiu que a concesionaria non vai asumir os 1,7 millóns de euros sen repercutir os custos nos recibos dos veciños.

Cañón tamén reiterou que, se o goberno local non ten capacidade para negociar co ente autonómico Augas de Galicia, “deben deixarnos gobernar, que é o que merecemos porque gañamos as eleccións municipais”. Ademais, criticou a falta de xestión do bipartito, asegurando que “xogan cun servizo básico como é a auga”, e anunciou que o PP presentou unha alegación contra a prórroga e levará o tema a pleno cunha moción para intentar invalida-la decisión.

Ambos partidos continúan enfrontados pola xestión da nova EDAR de Niño do Corvo, coa falta de colaboración entre a Xunta e o Concello no centro do conflito.