🔴 MANIFESTO CONTRA AS VIOLENCIAS MACHISTAS – CONSELLO LOCAL DA MULLER / 25N – 2024

Lido por Concha Félix Dos Santos, muller de etnia xitana que traballa no departamento de Obras e hoxe é a conserxe do CEIP de Vilaxoán.

Outro 25 de novembro máis, dende o Consello Local da Muller vémonos na obriga de saír á rúa para berrar: BASTA XA DE VIOLENCIAS MACHISTAS!

Hoxe estamos aquí para alzar a nosa voz polas que non están e loitar contra a impunidade da violencia machista. Pero tamén polas que están, por todas nós, para que non nos falte ningunha máis!

As mulleres do Consello Local aprendemos, moitas de nós da man do feminismo, a non quedar caladas. Non somos nin seremos cómplices deste silencio patriarcal que é o responsable de 76 feminicidios cometidos no Estado español no que vai de ano.

Pero iso non é todo. Tan só en Galicia, máis de 4.100 mulleres tiveron que solicitar protección este ano. 4.100 mulleres violentadas, que temen pola súa vida e pola das súas crianzas, vendo truncados os seus proxectos ante a ameaza da violencia machista.

Con estes datos terribles, temos que soportar que desde algunhas administracións se promovan campañas de negación da violencia de xénero, campañas que cousifican e culpabilizan ás mulleres, poñendo o foco nas vítimas en lugar de nos agresores. Temos que soportar sentenzas que esquecen as vítimas, fomentando o medo e a inseguridade á hora de recorrer ás institucións.

Hoxe estamos aquí para seguir loitando pola eliminación de TODAS as formas de violencia contra as mulleres. A violencia é explotación sexual, reprodutiva, económica, psicolóxica, verbal, estrutural, simbólica, obstétrica, e outras formas que lamentablemente existen. As mulleres temos dereito a vivir unha vida segura, libre de violencias machistas!

Estamos fartas de escoitar que “a pobreza ten cara de muller” ou que a fenda salarial persiste. A economía dos coidados segue recaendo sobre as nosas costas, e o desmantelamento do Estado do benestar agrava a feminización da pobreza. Expresamos a nosa solidariedade coas compañeiras do Servizo de Axuda no Fogar na súa loita por condicións dignas.

Queremos alertar sobre a violencia dixital, que afecta especialmente ás rapazas novas, reproducindo comportamentos de acoso e control patriarcais a través de redes sociais e novas tecnoloxías. Tamén denunciamos a violencia estética, que impón cánones de beleza inalcanzables, afectando a saúde física e mental das mulleres.

A sociedade normaliza violencias, desde o consumo de pornografía mainstream ata o uso das redes sociais para minar a autoestima. Necesitamos educar en igualdade, cun sistema educativo público e de calidade, con perspectiva de xénero nas aulas, e medios de comunicación responsables.

Esiximos institucións que sexan espazos seguros, con garantías para que as mulleres denuncien as agresións machistas sen medo á revitimización. O sistema xudicial debe incorporar o enfoque de xénero para ofrecer unha protección real ás vítimas.

Non esquecemos ás crianzas vítimas da violencia vicaria, a expresión máis extrema da violencia de xénero. Dende 2013, máis de 40 nenos e nenas foron asasinadas no Estado español polos seus proxenitores, como forma de torturar ás nais. BASTA XA!

Grazas a todas as predecesoras que loitaron pola igualdade e ao movemento feminista, que continúa a súa loita. Porque hoxe, como cada ano, faltan as asasinadas, e xa basta de minutos de silencio.

Porque queremos cambiar as cousas que non podemos aceptar. Porque a igualdade será efectiva cando todas as mulleres teñamos todos os dereitos.

Por todo isto, solicitamos ao Pleno do Concello que apoie este Manifesto, traballando para facer realidade as propostas nel recollidas e participando na súa lectura o vindeiro 25 de novembro ás 12:00 horas.