🔴 O PP DE VILAGARCÍA CRITICA O REXEITAMENTO DO PSOE-BNG ÁS SÚAS ENMENDA FISCAIS PARA APOIAR EMPREGO E ACCESO Á VIVENDA

O Partido Popular de Vilagarcía lamenta o rexeitamento do goberno municipal, conformado polo PSOE e o BNG, ás enmendas que presentou para modificar as ordenanzas fiscais, especialmente as que afectan ao Imposto de Actividades Económicas (IAE) e ao Imposto sobre Construcións, Instalacións e Obras (ICIO). Estas enmendas, presentadas no pleno do pasado xoves tras a ausencia de reunión previa con outros grupos, buscaban frear o que o PP considera un “sablazo fiscal” que pretende impoñer o goberno local e, ao mesmo tempo, fomentar o emprego, apoiar ao pequeno comercio e mellorar o acceso á vivenda.

En canto ao IAE, o PP propuxo bonificacións para empresas que aumentasen a súa plantilla con contratos indefinidos e para aquelas que contraten a persoas desempregadas de longa duración, maiores de 50 anos, menores de 30 ou persoas con discapacidade. Segundo Ana Granja, portavoz popular, “Desde o Concello temos que utilizar todos os mecanismos posibles para incentivar e mellorar o emprego”.

No caso do ICIO, o PP solicitou bonificacións de ata o 50% para pequenas obras de modernización en comercios e para a rehabilitación de fachadas e tellados. Ademais, propuxeron incentivos para a rehabilitación de vivendas vacías destinadas ao alugueiro habitual, unha medida que buscan combater o problema do acceso á vivenda en Vilagarcía. O PP tamén incluíu propostas para promover a eficiencia enerxética e a insonorización de locais, medidas que, segundo Granja, “incentivan que familias ou hostaleiros poidan insonorizar os seus inmobles para mellorar a convivencia”.

O PP considera “incomprensible” que o PSOE e o BNG, nun momento en que Vilagarcía rexistra unha recadación fiscal histórica de 20,5 millóns de euros en 2025 (fronte aos 14,5 millóns en 2013, en plena crise), rexeiten medidas que, segundo os populares, mellorarían a economía local e a vida dos cidadáns. Granja lembrou que en xullo o goberno local presumía dun orzamento récord sen subir impostos, pero “só pasaron catro meses para que a realidade os fixera cambiar de opinión”.