Pouco antes de finalizar a súa décimo quinta edición, o Obradoiro de Hostalería do Salnés volveu demostrar o seu compromiso coa solidariedade e co apoio aos máis necesitados. Nesta ocasión, entregou máis de 100 menús a Cáritas Interparroquial de Arousa, en virtude do convenio de colaboración que ambas entidades manteñen desde hai anos.
Os menús, envasados ao baleiro e conxelados, facilitan o seu uso posterior, permitindo a súa distribución segundo as necesidades diarias e optimizando a xestión dos recursos por parte dos voluntarios.
Durante esta edición, os alumnos do obradoiro prepararon e doaron menús como parte da súa formación práctica, abarcando módulos de legumes, verduras,
carnes e peixes. Ademais, en datas sinaladas como o Nadal, desprazáronse ás instalacións de Cáritas en Vilagarcía de Arousa para elaborar e servir menús especiais, o que supón unha experiencia enriquecedora tanto para os estudantes como para os usuarios.
Mar Viqueira, directora de Cáritas Interparroquial de Arousa, destacou a importancia destas achegas: “Grazas a colaboracións como a dos obradoiros de hostalería da comarca, o comedor social pode atender diariamente a máis de 60 persoas usuarias”.
Este xesto solidario reafirma o compromiso do Obradoiro de Hostalería do Salnés co benestar da comunidade e co apoio ás entidades que traballan a prol das persoas máis vulnerables. Ademais, fomenta valores de solidariedade e responsabilidade social entre o alumnado, máis aló da súa formación profesional.
