🔴 O PLENARIO DE QUEREMOS GALEGO SALNÉS ANIMA A VECIÑANZA A PARTICIPAR NA MANIFESTACIÓN DO 23F

Onte celebrouse na sala de conferencias do Auditorio Municipal de Vilagarcía de Arousa o plenario de Queremos Galego na comarca do Salnés. O encontro contou cunha notable participación, reunindo preto de 50 persoas, co principal obxectivo de organizar a mobilización de cara á manifestación nacional que terá lugar o Día de Rosalía, o 23 de febreiro en Santiago de Compostela.

Durante a reunión, expuxéronse os preocupantes datos sobre a situación do idioma galego, que reflicten niveis de descoñecemento e uso inéditos na historia. Ademais, avaliáronse diferentes propostas e accións para avanzar na normalización lingüística do galego. Un dos puntos clave foi a organización da participación na manifestación do 23 de febreiro, que partirá da Alameda de Santiago.

No ámbito organizativo, o plenario elixiu por unanimidade a Laura Sáez como voceira comarcal e a Sandra Otero como coordinadora comarcal. O equipo complétano Jose Luis Domínguez Lucio, Beatriz Villanueva e Felipe Radío como voceiros adxuntos.

Queremos Galego Salnés fai un chamamento á veciñanza para que acuda masivamente á manifestación en Santiago e así defender e promover o uso do galego.